काठमाडौं – कञ्चनपुरकी १३ वर्षीया बालिका निर्मला पन्तको बलात्कारपछि हत्या भएको एक वर्ष पुगेको छ ।
वर्ष दिनको अवधिमा निर्मलाको न्यायका लागि सरकारी तवरबाट धेरै प्रयास भएको बताइए पनि उनले न्याय पाउन भने सकेकी छैनन् ।
१० साउन २०७५ मा साथीको घर जान भन्दै घरबाट हिडेकी भीमदत्त नगरपालिका वडा नम्बर २, उल्टाखामकी निर्मलाको ११ गते बिहान घर नजिकैको उखुबारीमा बलात्कारपछि हत्या गरिएको अवस्थामा शव भेटिएको थियो । यसबीचमा निर्मलाको हत्याको छानबिनका लागि करिब आधा दर्जन छानबिन समिति बनेका छन् । सबैजसो समितिले निर्मलाको बलात्कारपछि हत्या भएको निष्कर्ष निकालेको छ ।
यस्तै, ती समितिका प्रतिवेदनले प्रहरीबाट सुरुवाती चरणमा नै अनुसन्धानमा लापर्बाही भएको भन्दै निष्कर्षसमेत दिएका छन् । तर, हत्यामा संलग्नलाई भने कुनै पनि प्रतिवेदनले किटान गर्न सकेको छैन । हत्यारा पत्ता लगाउन सरकारबाट भएका हालसम्मका सबै प्रयास असफल भएका छन् ।
प्रहरीले भने निर्मला पन्तको हत्या अनुसन्धान जारी रहेको र हत्यारा पत्ता नलाग्दासम्म अनुसन्धानले विश्राम नपाउने बताएको छ ।
घटनाका विषयमा शंकामा रहेका दुई दर्जनभन्दा बढी शंकास्पद व्यक्तिको हालसम्म डीएनएसमेत जाँच भएको छ करिब एक दर्जन शंकास्पद व्यक्ति पक्राउ परेर पनि छुटिसकेका छन् । निर्मलाको न्यायका लागि भएको आन्दोलनमा प्रहरीले गोली चलाउँदा घाइते भएकाको अहिले पनि राजधानीमा उपचार जारी छ ।
७ भदौको आन्दोलनका क्रममा दायाँ खुट्टामा गोली लागेर घाइते भएका भीमदत्त नगरपालिका वडा नम्बर ४ का अर्जुन भण्डाराको काठमाडौंस्थित शिक्षण अस्पतालमा उपचार भइरहेको छ । उनको दायाँ खुट्टा काटिएको छ भने शरीरका अन्य भागसमेत चल्न छाडेका छन् । एक वर्षदेखि अस्पतालमा रहेका उनको उपचार खर्च समेत गत वैशाखबाट सरकारले दिन छाडेपछि समस्या भएको परिवारले गुनासो गर्दै आएको छ ।
