लमजुङ – लमजुङमा भूकम्प जाँदा १५ वटा घर भत्केका छन् । भूकम्पले घर भत्किँदा चोट लागेर ४ जना घाइते भएका छन् । प्रहरीका अनुसार मर्स्याङ्दी गाउँपालिकाका ४० वर्षीया उमा गुरुङ र ८३ वर्षीया खवकुमारी पाण्डे घाइते भएकी छिन् । अर्का दुई जना घाइतेको नाम खुलेको छैन ।
जिल्ला प्रहरी कार्यालय लम्जुङका डिएसपी गंगाबहादुर थापाका अनुसार अहिलेसम्म १५ घर भत्केको जानकारी प्राप्त भएको छ। घाइतेहरुको संख्या केही बढ्न सक्ने सम्भावना रहेको उनले बताए ।
डिएसपी थापाका अनुसार भत्किएका सबै घर कच्ची हुन् । घाइतेलाई जिल्ला अस्पतालमा उपचारका लागि ल्याइएको उनले बताए । गाउँमा कच्ची घर भएकोले पनि भूकम्पले भत्काउँदा स्थानीयहरु घाइते हुन पुगेको थापाले बताए ।
लम्जुङको भूलभूले, बाँझाखेत आसपासमा केन्द्र रहेर आज बिहान ५ बजेर ४२ मिनेटमा ५.८ म्याग्नीच्युडको भूकम्प गएको राष्ट्रिय भूकम्प मापन तथा अनुसन्धान केन्द्रले जनाएको छ । त्यही भूकम्पमा परेर केन्द्रबीन्दु आसपासका केही घरमा क्षति पुगेको हो ।
