एमालेले कांग्रेस सभापति शेरबहादुर देउवालाई प्रधानमन्त्रीमा समर्थन गर्दै हस्ताक्षर गरेका वरिष्ठ नेता माधवकुमार नेपाल र झलनाथ खनालसहित ११ सांसदलाई कारबाही अगाडि बढाउन स्पष्टीकरण सोध्ने निर्णय गरेको छ ।
खनाल–नेपाल पक्षका नेताहरूले प्रधानमन्त्री केपी ओलीको यो कदमले पुनः संसद् पुनस्र्थापनाको सम्भावना बढाएको बताएका छन् । प्रधानमन्त्रीनिवास बालुवाटारमा शनिबार बसेको स्थायी कमिटी बैठकले वरिष्ठ नेता नेपाल र खनालसहित ११ नेतालाई स्पष्टीकरण सोध्ने निर्णय गरेको हो ।
स्पष्टीकरण मागिएका संघीय सांसद झलनाथ खनाल, माधव नेपाल, भीम रावल, मुकुन्द न्यौपाने, रामकुमारी झाँक्री, कल्याणी खड्का, सरला यादव, पुष्पा कर्ण, लक्ष्मी चौधरी, कलिला खातुन र निरा जैरु । उनीहरूमध्ये नेपाल, खनाल र रावलबाहेक सबै सांसद समानुपातिक सूचीका रहेका छन् ।
स्पष्टीकरण नसोधिएका सांसदहरूमा पवित्रा निरौला खरेल, भवानी खापुङ, गणेश पहाडी, यज्ञराज सुनुवार, विरोध खतिवडा, कृष्णलाल महर्जन, जीवनराम श्रेष्ठ, नारायण खतिवडा, घनश्याम भुसाल, गोकर्ण विष्ट, सोमप्रसाद पाण्डे, दीपकप्रकाश भट्ट, मेटमणि चौधरी, झपट रावल र सुरेन्द्र पाण्डे छन् ।
उनीहरूमध्ये खरेल, पहाडी, खतिवडा, भुसाल, विष्ट, सुरेन्द्र पाण्डे र भट्टले देउवालाई प्रधानमन्त्री बनाउन हस्ताक्षर नगरेको सार्वजनिक रूपमै बताइसकेका छन् । उता, सोमप्रसाद पाण्डे र यज्ञराज सुनुवारले पनि नेपाललाई प्रधानमन्त्री बनाउने सर्तमा मात्र हस्ताक्षर गरिएको जानकारी गराएको बालुवाटार स्रोतको दाबी छ ।
