पोखरा – बिहीबार दिउँसो पक्राउ परेका नेपाली काँग्रेसका नेता गणेश लामा रिहा भएका छन् । उनलाई आज शुक्रबार जिल्ला प्रशासन कार्यालय कास्कीले रिहा गरेको हो ।
कास्कीमा प्रमुख जिल्ला अधिकारी थानेश्वर गौतमले नेता लामासहित तीन जनालाई नै रिहा गरेको जिल्ला प्रहरी कार्यालय कास्कीका प्रहरी नायव उपरीक्षक (डिएसपी) सुवास हमालले जानकारी दिए ।
डिएसपी हमालका अनुसार पक्राउ परेका लामासहित तीनै जना जनही दुई हजार रुपैयाँ जरिवाना बुझाएर प्रशासनले रिहा गरेको हो ।
यसअघि विनासर्त रिहा हुने भने पनि प्रजिअ गौतमले अन्तिममा सामान्य जरिवाना रकम मागेको बताइएको छ । प्रहरीले लामासहित तीन जनालाई लकडाउन उल्लङ्घन गर्दै पोखरा आएको आरोपमा बिहीबार लेकसाइडस्थित एक होटेलबाट पक्राउ गरेको थियो ।
