काठमाडौँ – नेकपा एमालेको विवाद समाधानको प्रयासस्वरुप बसेको कार्यदलको बैठक सकारात्मक बनेको छ । अध्यक्ष केपी ओली र वरिष्ठ नेता माधव कुमार नेपाल पक्षीय कार्यदलको बैठक सकारात्मक बनेको नेता प्रदीप कुमार ज्ञवालीले जानकारी दिए ।
उनले विवाद समाधान निष्कर्षउन्मुख भएको भन्दै भोलि फेरि बैठक बसेर टुंग्याइने जानकारी दिए । ‘छलफल सकारात्मक बनेको छ । भोलि फेरि बैठक बसेर सबै विषय टुंग्याउँछौँ’, उनले भने।
यसअघि सोमबार र मंगलबार सम्पन्न बैठकमा पार्टी विवादका विषयलाई कसरी टुंगोमा पुर्याउने भन्ने विषयमामा छलफल भएको थियो।
यसअघिको बैठकमा पार्टीभित्रको विवादित विषय, भिन्न मत र असहमति कहाँ–कहाँ छन् र यसलाई कसरी समाधानमा पुर्याउन सकिन्छ भन्ने विषयमा छलफल केन्द्रित रहेको कार्यदलका एक सदस्यले बताए।
एमालेको एकता जोगाउन भन्दै केही समय अगाडि गठन भएको कार्यदल सोमबारदेखि सक्रिय बनेको छ ।
पार्टी अध्यक्ष ओली र वरिष्ठ नेता माधव नेपाल सम्मिलित १० सदस्य कार्यदलको बैठक सोमबारबाट सिंहदरबारस्थित अर्थमन्त्रालयमा बस्दै आएको छ । मंगलबार वार्ता टोलीको छलफल चलिरहेका बेला माओवादी अध्यक्ष प्रचण्ड माधव नेपाललाई भेट्न गएका थिए ।
