काठमाडौं – नेकपा एमालेको माधव नेपाल खेमाको बैठक सकिएको छ । प्रधानमन्त्री शेरबहादुर देउवालाई विश्वासको मत दिएका आफ्नो पक्षका सांसदहरूलाई बैठकमा बोलाइएको थियो ।
मंगलबार नयाँ बानेश्वरस्थित अर्याल होटलमा भेला भएका नेपाल पक्षका सांसदहरूले नेता नेपाललाई नयाँ पार्टी निर्माण गरेर अघि बढ्न सुझाएका हुन्
भेलामा सहभागी सांसद मेटमणि चाैधरीले ओलीजस्तो शासकले एमालेलाई सग्लो बनाउन नसक्ने भएकाले कानुनले दिन्छ भने नयाँ पार्टी बनाएर जानुपर्छ भन्ने सुझाव सहभागीहरूले दिएको बताए।
‘यदि कानुनले दिन्छ भने नयाँ पार्टी बनाएर जानुपर्छ भन्ने सुझाव आएको छ। कानुन र संविधानले दियो भने हामी त्यतातिर जान्छौं। हामी वकिलहरुसँग पनि छलफल गर्छौं’, चाैधरीले भने।
देउवाले संसदमा विश्वासको मत माग्दा नेपाल पक्षका केही संसदहरुले मतदान बहिष्कार गरेका थिए भने केहीले सरकारको समर्थनमा भोट हालेका थिए । केपी ओली पक्षका ८ जना सांसदले पनि देउवालाई समर्थन गरेका छन् ।
