काठमाडौं – ललितपुरको च्यासलस्थित तुलसीलाल स्मृति प्रतिष्ठानमा केही बेरअघि एमालेको स्थायी कमिटी बैठक शुरू भएको छ । बैठक अहिले जारी छ ।
अध्यक्ष केपी शर्मा ओलीले १० बुँदे सहमतिको औचित्य समाप्त भएको टिप्पणी गरेको भोलिपल्ट बैठक बसेको हो । बैठकमा तत्कालीन माधव नेपाल समूहका नेताहरु पनि सहभागी छन् ।
ओलीको अभिव्यक्तिको सार्वजनिक रुपमै खण्डन गरेका उपाध्यक्ष भीम रावल र उपमहासचिव घनश्याम भुसाल भने ढिलो गरी बैठकमा छिरेका छन् ।।
त्यसअघि रावल,भुसाल र सुरेन्द्र पाण्डेले आफूनिकट नेताहरुसँग छुट्टै छलफल गरेको बताइएको छ । १० बुँदेलाई लिएर ओलीले दिएको अभियक्तिबारे बैठकमा कुरा उठाउने रावलहरुको तयारी रहेको जनाइएको छ ।
आजको बैठकमा विधान महाधिवेशनको समीक्षा, वडा र पालिकास्तरीय अधिवेशनको तयारी, राष्ट्रिय महाधिवेशन र अविरल वर्षाका कारण भएको जनधनको क्षतिका सम्बन्धमा छलफल गर्नेगरी एजेण्डा तय गरिएको छ । अहिले अध्यक्ष ओलीले बैठकलाई सम्बोधन गरिरहेका छन् ।
