काठमाडौँ – गृह मन्त्रालयले थप ५ जिल्लाका प्रमुख जिल्ला अधिकारी (सीडीओ) को सरुवा गरेको छ।
गृहमन्त्री बालकृष्ण खाँणले सल्यान, काभ्रेपलञ्चाेक, नवलपरासी पूर्व, कालिकोट र धनुषाका प्रमुख जिल्ला अधिकारीको सरुवा गरेका हुन्। जसअनुसार विपिन आचार्य सल्यानको प्रमुख जिल्ला अधिकारी भएका छन्। उनी यसअघि राष्ट्रिय विपद् जोखिम न्यूनीकरण प्राधिकरणमा थिए।
गृह मन्त्रालयकी सहसचिव हुमकला पाण्डे काभ्रेपलाञ्चाेक, सुमन घिमिरे नवलपरासी पूर्व, गृहका उपसचिव रामहरि शर्मालाई कालिकोटको प्रमुख जिल्ला अधिकारी बनाइएकाे छ। यस्तै सुरेन्द्र पौडेलले धनुषाको प्रमुख जिल्ला अधिकारीको जिम्मेवारी प्रदान गरिएकाे छ।
सल्यानकी सीडीओ लक्ष्मीदेवी हुमागाई खतिवडा, कालिकोटका सीडीओ कृष्णप्रसाद आचार्य, काभ्रेपलाञ्चाेकका शिवराम पोख्रेल, धनुषाका सीडीओ बन्धुप्रसाद बाँस्तोलालाई भने गृह मन्त्रालय तानिएकाे छ।
त्यस्तै संघिय मामिला तथा प्रशासन मन्त्रालयले थप ६ जना सहसचिवको सरुवा गरेको छ। सामान्य प्रशासनमन्त्री राजेन्द्र श्रेष्ठले शुक्रबार सरुवा गर्ने निर्णय गरेका हुन्।
जसअनुसार धनकुटाका प्रमुख जिल्ला अधिकारी कृष्णप्रसाद पन्थ लुम्बिनी प्रदेशको शिक्षा, विज्ञान तथा प्रविधि मन्त्रालय तथा लगानी बोर्डका सहसचिव सुरेन्द्र पौडेल गृह मन्त्रालय वा यसअन्तर्गतकाे निकाय सरुवा भएका छन्।
संघीय मामिला मन्त्रालयको अतिरिक्त समूहमा रहेका सहसचिव राम आधार शाह शिक्षा, विज्ञान तथा प्रविधि मन्त्रालय तथा शिवप्रसाद रेग्मीलाई वन मन्त्रालय सरुवा गरिएको छ।
यस्तै राष्ट्रिय पुनर्निर्माण प्राधिकरण खारेज भएपछि संघीय मामिला मन्त्रालयको अतिरिक्तमा रहेका भगवान् अर्याललाई लगानी बोर्डमा सरुवा गरिएको छ।
यस्तै श्रम, रोजगार तथा सामाजिक सुरक्षा मन्त्रालयका सहसचिव बद्रीनाथ अधिकारीलाई गण्डकी प्रदेशको आन्तरिक मामिला तथा कानुन मन्त्रालय सरुवा गरिएको छ। मन्त्रालयले यसअघि गत मंगलबार मात्र १० जना सहसचिवको सरुवा गरेको थियो।
