काठमाडौं – पूर्वराजा ज्ञानेन्द्र शाह मंगलबार पृथ्वी जयन्तीको अवसरमा पृथ्वीनारायण शाहको शालिकमा माल्यार्पण गर्न सिंहदरबार जाने भएका छन् । उनी मध्यान्ह साढे १२ बजे त्यहाँ पुग्ने कार्यक्रम छ ।
उनी सिंहदरबारको मुल गेट अगाडि रहेको शाहको सालिकमा माल्यार्पण गर्न जाने कार्यक्रम रहेको पूर्वराजाका संवाद सचिव फणि पाठकले बताए । मंगलबार पृथ्वीनारायण शाहको ३०० जन्मजयन्ती मनाइँदैछ । यो दिवसको अवसरमा सरकारले सार्वजनिक बिदा भने दिएको छैन ।
यस्तै देशका विभिन्न पालिकाहरुले पर्सी २७ गते मङ्गलवार सार्वजनिक बिदा दिने निर्णय गरेका छन् । विभिन्न नगरपालिकाहरुले फरक–फरक सूचना जारी गर्दै सार्वज्निक विदाबारे जानकारी गराएको हो ।
यसैबीच, राष्ट्रिय प्रजातन्त्र पार्टी राप्रपाका अध्यक्ष राजेन्द्र लिङ्देनले प्रधानमन्त्री शेरबहादुर देउवालाई भेटेर २७ गते देशभर सार्वजनिक विदा दिन आग्रह गरेका छन् ।
अध्यक्ष लिङदेनले प्रधानमन्त्री निवास बालुवाटार पुगेर प्रधानमन्त्री देउवालाई भेटेर यस्तो आग्रह गरेका हुन् । बालुवाटार पुगेका लिङ्देनसहित राप्रपा नेताहरूले पृथ्वी जयन्तीमा सार्वजनिक बिदा दिन प्रधानमन्त्री देउवाको ध्यानाकर्षण गराएका हुन् ।
पृथ्वी जयन्तीका दिन पुस २७ मा बिदा दिन राप्रपा प्रतिनिधिमण्डलले माग गरिएको राप्रपा नेता मोहन श्रेष्ठले बताए । साथै पृथ्वी जयन्तीलाई राष्ट्रिय एकता दिवसका रूपमा मनाउनुपर्ने पनि राप्रपाले माग गरेको छ । राप्रपाले प्रधानमन्त्री देउवालाई पृथ्वी जयन्तीमा बिदा दिन माग गर्दै ज्ञापन पत्र पनि बुझाएको छ।
यस्तै गोरखाको गोरखा नगरपालिकाले पृथ्वीजयन्तीको दिनमा सार्वजनिक बिदा दिने निर्णय गरेको छ । गोरखा नगरकार्यपालिकाको बैठकले पृथ्वी जयन्तीकाको अवसरमा आउँदो पुस २७ गते सार्वजानिक बिदा दिने निर्णय गरेको हो ।
२०७८ पौष २७ गते मंगलबार यस नगरपालिकाका कार्यालय, वडा कार्यालयहरु, नगरपालिका अन्तरगत स्वास्थ्य संस्थाहरु तथा शैक्षिक संस्थाहरुमा १ दिन सार्वजनिक बिदा हुने नगरपालिकाले जारी गरेको विज्ञप्तिमा भनिएको छ ।
यस्तै, स्याङ्जाको वालिङ नगरपालिकाले आज आइतवार एक सूचना निकालेर पुस २७ गते पृथ्वी जयन्ती तथा राष्ट्रिय एकता दिवसको दिन सार्वजनिक बिदा दिने निर्णय भएको जानकारी दिएको हो । पृथ्वीनारायण शाहप्रति सम्मान गर्दै सार्वजनिक बिदा दिने निर्णय गरिएको सूचनामा भनिएको छ ।
विश्व हिन्दु युवा संघ स्याङ्जाको अनुरोधलाई स्वीकार गर्दै एकता दिवस मनाउने उद्धेश्यले सार्वजनिक बिदा दिएको नगरपालिकाले जनाएको छ। संघका अध्यक्ष नवराज पौडेल, केन्द्रीय सदस्य डण्डपाणी पंगेनी, समाजसेवीद्धय बसन्त मल्ल र राजु रेग्मी लगायतका पदाधिकारीसहितको टोलीले वालिङ् नगर प्रमुख दिलिपप्रताप खाँणलाई २७ गतेलाई राष्ट्रिय एकता दिवससहित सार्वजनिक बिदाको माग गर्दे अनुरोधपत्र बुझाएका थिए।
विभिन्न बाईसे र चौबिसे राज्यमा टुक्रे मुलुकलाई एकीकरण गरेर ऐतिहासिक कार्य गरेका व्यक्तिलाई कहिल्यै बिर्सनु नहुने सो पत्रमा उल्लेख छ । सो पत्र बुझ्दै नगर प्रमुख खाँणले सबैभन्दामाथि राष्ट्र र राष्ट्रियता भयको बताउँदै पृथ्वीनारायण शाहका योगदान र साहसलाई सम्मान गर्दे पुस २७ गते राष्ट्रिय एकताको अवसरमा सार्वजनिक बिदा दिने बताए।
