नेकपा एमालेको युवा संगठन राष्ट्रिय युवा संघ, नेपालले आफ्नो नवौं राष्ट्रिय महाधिवेशनका लागि आयोजक कमिटी गठन गरेको छ।
पोखरामा गत पुस २८–३० गतेसम्म आयोजित युवा संघ केन्द्रीय सचिवालयको दोस्रो पूर्ण बैठक र नवौं महाधिवेशन आयोजक कमिटीको पहिलो पूर्ण बैठकले किरण पौडेलको संयोजकत्वमा ४०५ सदस्यीय नवौं राष्ट्रिय महाधिवेशन आयोजक कमिटी गठन गरेको हो। आयोजक कमिटीको सहसंयोजकमा सञ्जिवकुमार झा र क्रान्ती बुर्लाकोटी छन्।
साथै बैठकले विभिन्न निर्णय गरी देशभरका मातहतका कमिटीलाई विशेष सर्कुलर पनि जारी गरेको छ। सर्कुलरअनुसार राष्ट्रिय महाधिवेशनपछिको दोस्रो हैसियत कायम रहने गरी २५०१ सदस्यीय केन्द्रीय युवा परिषद गठन गर्ने निर्णय पनि गरिएको छ।
परिषदमा २० प्रतिशत सदस्य मनोनयन गरिनेछ। यस्तै युथफोर्स र साइबर सर्कल विभागलाई केन्द्रदेखि वडासम्म बिस्तार गरिने सर्कुलरमा उल्लेख छ।
यसअघिका सबै पदाधिकारी कार्यालय सदस्य र विभागका प्रमुख बनेका छन् ।संयोजक पौडेल र सहसंयोजक झा एमाले केन्द्रीय सदस्य हुन् ।
अर्की सह संयोजक क्रान्ति बुर्लाकोटी १० बुँदे सहमतिपछि एमालेमा रहेको समूहबाट सह संयाजक बनाइएको हो ।१० बुँदे समूहबाटै कृष्णहरी केसी कार्यालय सदस्य बनेका छन् ।
युवा संघले १३ सदस्यीय कार्यालय टिम बनाएको छ । कार्यालय सदस्यको नाम घोषणा गर्दै युवा संघका इञ्चार्ज महेश बस्नेतले प्राविधिक कारण पदाधिकारी घोषणा नभएपनि कार्यालय सदस्यहरु नै पदाधिकारी हैसियतमा रहने बताए ।
