नेकपा एकीकृत समाजवादीका अध्यक्ष माधवकुमार नेपालले तीनवटै तहका निर्वाचनमा पाँचदलीय गठबन्धन मिलेर नै चुनाव लड्ने बताएका छन्। अध्यक्ष माधवकुमार नेपालले स्थानीय तहको चुनाव आगामी २०७९ चैतसम्म गर्दा पनि फरक नपर्ने बताएका छन्।
रामेछापबाट विभिन्न दलका कार्यकर्तालाई पार्टी प्रवेश गराउने क्रममा मंगलबार काठमाडौंमा बोल्दै उनले यस्तो भनेका हुन्।
मंगलबार रामेछाप जिल्लाका विभिन्न पार्टीका युवालाई नेकपा एसमा प्रवेश गराउने कार्यक्रमलाई सम्बोधन गर्दै अध्यक्ष नेपालले संविधानमा भएको व्यवस्था अनुसार नै निर्वाचन हुने बताए।
‘अहिले निर्वाचनको कुरा भइरहेको छ। स्थानीय तहको निर्वाचन तीन चरणमा बैशाख, असार र असोजमा भएको थियो,’ उनले भने, ‘स्थानीय तहको अन्तिम परिणाम असोज ७ मा आएको थियो। त्यो नै अन्तिम मिति हुन्छ। यो अहिले बहसको विषय बनेको छ। संविधानमा पनि प्रष्ट रुपमा नै लेखेको छ।’
‘२०७४ सालमा पहिलो चरणको स्थानीय चुनाव वैशाख ३१ मा भएको थियो। दोस्रो चरणको चुनाव असार १४ मा भएको हो। तेस्रो चरणको चुनावमा असोज २ मा भएर अन्तिम परिणाम असोज ७ मा आएको हो’, उनले भने, ‘संविधानमा पनि गाउँ सभा र नगरसभाको चुनाव सकिएको छ महिना भित्र निर्वाचन गर्ने भनेको छ। असोजमा कार्यकाल सकिने भएकाले स्थानीय तहको चुनावमा २०७९ को चैतसम्म चुनाव हुनुपर्छ।’
तर अध्यक्ष नेपालले त्यही कार्यक्रममा आगामी असोज, कात्तिक या मंसिरमा तीनै तहको चुनाव हुने पनि जिकिर गरे।
‘यी सबै सन्दर्भमा पाँचवटा दल मिलेर हामी चुनाव गराउँछौँ’, उनले भने, ‘असोज, कात्तिक र मंसिरमा प्रदेश, केन्द्र र स्थानीय चुनावमा जाने छौँ।’
