मधेस प्रदेशबाट राष्ट्रिय सभा सदस्यमा गठबन्धनबाट नेकपा माओवादी केन्द्रकी उर्मिला अर्याल विजयी भएकी छन् । अर्यालले स्थानीय तहबाट १५८ मत र प्रदेश तर्फ ६९ मत प्राप्त गरी ६१५६ मतभारत प्राप्त गरेकी छन् ।
महिला समूहबाट लोकतान्त्रिक समाजवादी पार्टीकी उम्मेदवार रुपा यादवले स्थानीयतर्फ ८१ र प्रदेशबाट २७ मत प्राप्त गरी २७५४ मतभार प्राप्त गरेकी छन् । एमालेकी उम्मेदवार बीना साहले स्थानीयतर्फ ९ र प्रदेशतर्फ ३ गरी कुल ३०६ मतभार प्राप्त गरेका छन् ।
रिक्त रहेका १९ पदका लागि सातै प्रदेशमा भएको राष्ट्रिय सभा निर्वाचन भएको थियो । निर्वाचन आयोगका प्रवक्ता शालिग्राम शर्माका अनुसार निर्वाचनमा दुई हजार सात मत खसेको थियो ।
देशका विभिन्न प्रदेशमा कायम रहेका आठ मतदानस्थल र १४ केन्द्रमा बिहान ९ देखि दिउँसो ३ बजेसम्म मतदान भएको हो । निर्वाचन सकिएलगत्तै मत गणना सुरु गरिएको थियो ।
आगामी फागुन २० गते नेकपा (एमाले)का आठ, नेकपा (एकीकृत समाजवादी) का चार, नेकपा (माओवादी केन्द्र) का चार र नेपाली कांग्रेसका तीन राष्ट्रियसभा सदस्यको पदावधि सकिने भएकाले ती रिक्त स्थानका लागि निर्वाचन भएको हो ।
सदस्यको पदावधि समाप्त हुन ३५ दिनअघि नै निर्वाचन गर्नुपर्ने प्रावधान छ । नेपाली कांग्रेस, नेकपा (एमाले), नेकपा (माओवादी केन्द्र), नेकपा (एकीकृत समाजवादी), राष्ट्रिय जनमोर्चा, लोकतान्त्रिक समाजवादी पार्टी नेपाल, नेपाल मजदुर किसान पार्टी, जनता समाजवादी पार्टी नेपाल र राष्ट्रिय प्रजातन्त्र पार्टीका उम्मेदवार निर्वाचन प्रतिस्पर्धामा थिए ।
