काठमाडौं – नेकपा एमालेका सचिव योगेश भट्टराईले आफ्नो पार्टीविरुद्ध गठबन्धन किन गरिएको हो ? भन्नेबारे कारण खुलाएका छन् ।
उनले प्रदेशमा मन्त्रालय फुटाउँदै मन्त्रीको संख्या थप्न, र चालु र अनुत्पादक खर्च बढाउन एमालेविरुद्ध गठबन्धन गरिएको र आवद्यिक निर्वाचनलाई टार्दै स्वेच्छाचारी शासन लम्ब्याउन पनि आफ्नो पार्टीविरुद्ध गठबन्धन गरिएको टिप्पणी गरेका छन् ।
सामाजिक सञ्जाल ट्विटरमा भट्टराईले यस्तो लेखेका हुन् । उनले लेखेका छन्-“एमाले बिरुद्धको गठबन्धन किन ? प्रदेशमा मन्त्रालय फुटाउंदै, मन्त्रिको संख्या थप्दै चालु र अनुत्पादक खर्च बढाउन । आवधिक निर्वाचनलाई टार्दै स्वच्छाचारी शासन लम्ब्याउन ।”
यस्तै पाँच दलीय गठबन्धनलाई भाग मिलाउन प्रदेश १ का मन्त्रालय फुटाएर १२ पुर्याइएको छ। आइतबार बसेको प्रदेश १ को मन्त्रिपरिषद् बैठकले मन्त्रिपरिषद कार्यविभाजन नियमावली संशोधनसहित पारित गरेसँगै प्रदेशमा मन्त्रालय संख्या सातबाट बढेर १२ पुग्ने पक्का भएको छ।
तर मन्त्रालय फुटाउन मन्त्रिपरिषद् कार्यविभाजन नियमावली पारित गर्ने निर्णयबारे सरकारका कोही अधिकारी बोलेका छैनन्। मन्त्रिपरिषद् बैठकका आर्थिक मामिला तथा योजनामन्त्री इन्द्रबहादुर आङ्बोले सार्वजनिक गरे पनि मन्त्रालय फुटाउने निर्णय लुकाएका थिए।
मन्त्रिपरिषद्ले सामाजिक विकास, भूमि व्यवस्था, कृषि तथा सहकारी, भौतिक पूर्वाधार विकास र उद्योग पर्यटन, वन तथा वातावरण मन्त्रालय फुटाउने निर्णय लिएको हो।
मन्त्रालय फुटाएसँगै अबको केही दिनमै मन्त्रिपरिषद् विस्तार तयारी गरिएको छ। मुख्यमन्त्री राजेन्द्र राईले अब मन्त्रिपरिषद् विस्तार तयारी गरेका हुन्। मन्त्रिपरिषदले नियमावली संशोधन गरेपछि अब प्रदेशमा १ मा ५ वटा मन्त्रालय थपिएर १२ हुनेछन्।
