आज (आइतबार) मधेस प्रदेश सरकारमा एक राज्यमन्त्री नियुक्त गरिएको छ। नेकपा एकीकृत समाजवादीबाट नागेन्द्र राय यादवलाई उद्योग वन पर्यटन तथा वातावरण राज्यमन्त्रीमा नियुक्त गरिएको हो।
प्रदेश प्रमुख हरिशंकर मिश्रको उपस्थितिमा मुख्यमन्त्री लालबाबु राउतले नवनियुक्त राज्यमन्त्री यादवलाई आज बिहान शपथ खुवाएका छन्। राज्यमन्त्री बनेका यादव राैतहटका हुन्।
यसअघि गत मंसिर ५ गते नेकपा एकीकृत समाजवादीबाटै उद्योग वन पर्यटन तथा वातावरण मन्त्रीमा शत्रुधन महतो र प्रदेश मामिला तथा कानुनमन्त्रीमा प्रमोद यादव मधेस सरकारमा सहभागी भइसकेका छन्।
यस्तै प्रदेश १ का मुख्यमन्त्री राजेन्द्र राईले पनि आज मन्त्रिपरिषद् विस्तार गर्ने तयारी गरेका छन्। गठबन्धनमा भागबन्डा मिलाउन प्रदेश १ मा रहेका ७ मन्त्रालय विभाजन गरी १३ वटा बनाइएको छ।
आज हुने मन्त्रिपरिषद् विस्तारमा नेकपा एकीकृत समाजवादी र नेपाली कांग्रेसबाट तीन तीन र माओवादी केन्द्रबाट दुई जनाले सपथ ग्रहण गर्नेछन्।
एकीकृत समाजवादीबाट राजन राई, खिनु लिम्बु , उपेन्द्र घिमिरे मन्त्री बन्नेछन्। यस्तै‚ कांग्रेसबाट प्रतापप्रकाश हाङगाम, ओमप्रकाश सराबगी, शेखरचन्द्र थापा मन्त्री बन्नेछन्। यस्तै माओवादी केन्द्रबाट रामकुमार राई, झलकसिंह दर्लामी मन्त्री बन्नेछन्।
गठबन्धनमा भागबन्डा मिलाउन प्रदेश १ मा ७ बाट मन्त्रालय विभाजन गरि १२ बनाइएको थियो। तर‚ भागबण्डा नपुगेपछि पुनः मन्त्रालय फुटाएर १३ बनाएको छ।
