काठमाडौं – नेपाल ट्रष्टको नाममा रहेको छाउनीस्थित १५ रोपनी जग्गा पूर्वअधिराजकुमारी प्रेरणा राज्यलक्ष्मी देवी सिंहले २० दिनभित्र खाली गर्नु पर्ने भएको छ ।
सिंहले आफूले दाइजोवापत सो जग्गा पाएको दावी गरे पनि सर्वोच्चले ११ पुस २०७३ मा तत्कालीन प्रधानन्यायाधीश सुशीला कार्की, न्यायाधीहरु दीपककुमार कार्की र सपना मल्ल प्रधानको पूर्ण इजलासले घरजग्गा दाइजो नठहर्ने फैसला गरेको थियो ।
नेपाल ट्रष्टले सर्वोच्चको फैसला कार्यान्वयन गर्न भन्दै सिंहको नाममा पत्र काटेपछि पुनरावलोकनको माग गर्दै उनले निवेदन दिएकी थिइन ।
सर्वोच्चबाट भएको फैसला पुनरावलोकनको माग गर्दै निवेदन दिएपछि नेपाल ट्रष्ट केही समय हच्किएको थियो । -राजधानी दैनिकबाट