नेकपा नेत्रविक्रम चन्द ‘विप्लव’ समूह छोडेका ओमप्रकाश पुनसहित चार केन्द्रीय सदस्यले नेकपा माओवादी केन्द्रमा प्रवेश गर्ने तयारी गरेका छन् । । माओवादी धारा केन्द्रीकृत र ध्रुवीकृत गर्ने उद्देश्यका साथ विप्लव समूह छाडेको उनीहरुले संयुक्त विज्ञप्तिमा समेत उल्लेख गरेका छन् ।

विप्लव समूह छाडेका चार केन्द्रीय सदस्य माओवादी केन्द्रमा प्रवेश गर्ने प्रचण्ड निकट एक प्रभावशाली नेताले बताए । ‘विप्लव समूह छाडेका ओम पुनसहित चार केन्द्रीय सदस्य माओवादी केन्द्र प्रवेश गर्ने कुरा ओपन सेक्रेट जस्तै छ । उहाँहरु छिट्टै यसैसाता पार्टी प्रवेश गरेको सुखद खबर सुन्न पाउनुहुनेछ ’ ती माओवादी प्रभावशाली नेताले भने, ‘विप्लव समूहबाट पुनसहित चार केन्द्रीय सदस्य मात्रै होइन अरु ठूलो संख्यामा नेता कार्यकर्ता माओवादी प्रवेश गर्नु हुनेछ ।’

प्रचण्डले समेत केही दिनअघिको एक कार्यक्रममा माओवादी धारहरु एकीकृत र ध्रुवीकृत हुने संकेत देखिँदै गएको बताएका थिए ।

प्रचण्डले बोलेको हप्तादिन वित्न नपाउँदै पुनसहित चार केन्द्रीय सदस्य माओवादी प्रवेश गर्न लागेका हुन् । पुनसहित माओवादी प्रवेश गर्नेमा केन्द्रीय सदस्य शंकरबहादुर खड्का, दलबहादुर धामी, रमेश परियार छन् ।

खड्का पूर्व संविधानसभा सदस्य एवम् सेती ब्यूरो इन्चार्जको जिम्मेवारीमा छन् । धामी महाकाली इन्चार्ज छन् भने परियार कञ्चनपुर जिल्ला इन्चार्ज हुन । पुनसहित चार नेताले पार्टी छोडेपछि विप्लव समूहमा ठूलो खैलाबैला मच्चिएको छ ।

त्यसो त गत बैशाखमा नेकपाकै धर्मेन्द्र बाँस्तोलाले विप्लवलगायतका नेतालाई कारबाही गरेर नेकपा (बहुमत) गठन गरेका थिए।

नेकपा महासचिव नेत्रविक्रम चन्द समूह संसदवादमा फस्न लागेको भन्दै बास्तोलाले आफ्नै संयोजकत्वमा २६ वैशाख २०७९ मा नेकपा बहुमत गठन गरेका थिए।

कतिपय केन्द्रीय सदस्यहरुलाई एमालेको चुनाव चिन्हबाट चुनाव लडाएर पार्टीलाई संसदीय व्यवस्थामा फसाउने षड्यन्त्र भएपछि त्यसलाई अस्वीकार गर्दै आफूहरुले नयाँ पार्टी गठन गर्नु परेको संयोजक बास्तोलाले बताएका थिए।

नेकपा बहुमतको कार्यनीति वैज्ञानिक समाजवादी क्रान्ति सम्पन्न गर्ने रहेको र त्यसका लागि मुलुकको समृद्धि र स्वाधिनताको नारालाई अघि बढाउने योजना अघि सारेका थिए।

विप्लव पार्टीबाट प्रभावशाली जिल्ला इन्चार्जहरुले राजीनामा दिएपछि उनीहरु माओवादी केन्द्र प्रवेश गर्ने चर्चा पनि छ।

LEAVE A REPLY

Please enter your comment!
Please enter your name here