निमित्त प्रहरी महानिरीक्षक सहकुल बहादुर थापाले मातहतलाई चाडबाड केन्द्रीत सुरक्षा योजना बनाउन निर्देशन दिएका छन्।
मंगलबार भर्चअल माध्यमबाट निर्देशन दिँदै थापाले प्रदेश प्रहरी प्रमुख,ब्यूरो प्रमुख, नेपाल प्रहरी प्रदेश कार्यालयका प्रमुख र प्रदेश ट्राफिक प्रहरी कार्यालयका प्रमुखहरुलाई योजना बनाउन भनेका हुन्।
अपराध नियन्त्रण तथा अनुसन्धानलाई प्राथमिकतामा राखी चाडबाड केन्द्रित सुरक्षा योजना बनाई काम गर्न थापाले निर्देशन दिएको प्रहरी प्रधान कार्यालयले जनाएको छ।
प्रविधिजन्य तथा आर्थिक अपराधको अनुसन्धानमा अझ बढि संवेदनशील हुनुपर्ने उल्लेख गर्दै आगामी दिनमा आउन सक्ने चुनौतीहरूको विश्लेषण गरी सोही अनुरूप कार्ययोजना बनाउन उनले जोड दिए।
चाडबाडको बेलामा हुन सक्ने सडक दुर्घटना न्यूनीकरणका लागि सरोकारवाला निकायसँग आवश्यक समन्वय एवं सहकार्य गर्न पनि उनले भनेका छन्।
यस्तै आसन्न प्रतिनिधि तथा प्रदेश सभा निर्वाचनलाई निष्पक्ष, शान्तिपूर्ण र धाँधलीरहित तवरले सम्पन्न गर्नका लागि आवश्यक तयारी गर्न समेत थापाले निर्देशन दिएका छन्।
कार्यक्रममा नेपाल प्रहरी प्रधान कार्यालय प्रशासन विभाग प्रमुख प्रहरी अतिरिक्त महानिरीक्षक अरुण कुमार बिसी, त्रिभुवन अन्तर्राष्ट्रिय विमानस्थल सुरक्षा कार्यालयका प्रहरी नायव महानिरीक्षक श्याम ज्ञवाली, काठमाडौं उपत्यका ट्राफिक प्रहरी कार्यालयका प्रहरी नायव महानिरीक्षक मीरा चौधरी, काठमाडौं उपत्यका प्रहरी कार्यालयका प्रहरी नायव महानिरीक्षक किरण राणा लगायतका प्रहरी अधिकृतहरु उपस्थित थिए।
