रामेछाप – कोरोना भाईरसले मुलुक आक्रान्त बनेका बेला स्वास्थ्य राज्य मन्त्री परिवारका सवै सदस्य लिएर घुमफिरमा निस्कीएका छन् । राज्यमन्त्री नबराज रावत श्रीमती, छोरा, छोरी, स्वकिय सचिव र दुईजना सुरक्षाकर्मी सहित मंगलबार रामेछाप आईपुगेका हुन् ।
जिल्लामा भएका कोरोना सम्बन्धि गतिविधि निरीक्षण र अनुगमनका लागि भनेर आएका राज्य मन्त्री रावतले जिल्लाका जनप्रतिनिधी, पत्रकार र राजनीतिक दलका अगुवाहरुले कोरोना संक्रमणका लागि गर्नुपर्ने कामको फेहरीस्तको जवाफ दिदै घुमाउरो पारामा सरकारले जिल्लाका लागि यस भन्दा बढी केहि गर्न नसक्ने बताए । मन्थलीको जिएस होटलमा स्थानीय प्रशासनको आतिथ्यको पारिवारिक दिवाभोज पछि जिल्ला प्रशासन कार्यालयमा पुगेका मन्त्री रावतले लामो भाषण गर्दै कोरोनाबाट जोगिन भिडभाड नगर्न अर्ति समेत दिन भ्याए । तर उनले गाडिभरी परिवार खांदेर ल्याएकोमा भने बैठकका सहभागिले कुरीकुरी गरीरहेका थिए ।
स्वास्थ्य राज्य मन्त्रीले नेपालमा कोरोनाका लागि अर्बौ खर्च गरेको आरोप लगाए भएपनि कसैले नखाएको वताए । कोरोनाकै नाममा विना काम श्रीमति, छोरा, छोरी लिएर घुम्न निस्कीएका राज्यमन्त्री रावत रामेछाप आएर भने कुनै उपलव्धि नभएको बैठकका एक जनप्रतिनिधिले वताए । पिसीआर परिक्षणको रिपोर्ट १० औ दिन सम्म नआएको, आरडिटि प्रभावकारी नभएको, स्वास्थ्य कार्यालयमा बजेट अप्रयाप्त नभएको, स्थानीय सरकारलाई क्वारेन्टाईन र आइसुलेसन कक्ष संचालनमा कठिनाई भएको, स्वास्थ्य कर्मीको अभाव रहेकाे र जिल्लामा नै पिसीआर परिक्षणकाे तत्काल व्यवस्था गर्न माग गरिएको थियो । सहभागीकाे माग तथा गुनासाकाे राज्य मन्त्री राउतले चित्तवुझ्दाे जवाफ दिन सकेनन् ।
उनले जनताको माग बमोजिम लकडाउनलाई खुकुलो वनाएको भन्दै सरकार नागरिकका लागि जस्तो सुकै कदम उठाएर भएपनि कोरोना रोकथामका लागि लागिपरि रहेको बताउनु भयाे । मन्थलीको कार्यक्रम पछि उहाको परिवार सहितकाे लावालस्कर रामेछाप नगरपालिका, जिल्ला अस्पताल हुँदै काठमाडौ फर्किने तय भएकाे बताइकाे छ । राज्य मन्त्री रावतले सोमबार काभ्रे जिल्लामा परिवार सहित घुमफिरमा विताएको श्रोतले उल्लेख गरेको छ।
