काठमाडौं – नेकपा एकीकृत समाजवादीका प्रवक्ता जगनाथ खतिवडाले एमालेसँग संवाद गर्न शर्त राखेका छन्।
केन्द्रीय कमिटिको बैठकपछि पत्रकारसँग कुरा गर्दै उनले एमालेसँग संवादका लागि सर्वोच्च अदालतमा नेकपा एकीकृत समाजवादी अवैधानिक भएको दाबी गरेको मुद्दा फिर्ता लिनुपर्ने र आफूहरुलाई दलको मान्यता दिनुपर्ने बताए।
‘एमालेले आजसम्म राजनीतिक दलको दर्जा नै दिएको छैन,’ उनले भने, ‘यस्तो अवस्थामा कुनै संवाद हुँदैन। एमालेलाई संवाद चाहिएको हो, एकीकृत समाजवादीसँगै हुनुपर्छ भन्ने लागेको छ भने अदालतमा रहेको मुद्दा फिर्ता लियोस् अनि पार्टीलाई मान्यता दिएको अभिव्यक्ति आयोस्।’
त्यस्तै एमालेले संसद विघटनलाई गल्तीका रुपमा स्वीकार गर्नुपर्ने एकीकृत समाजवादीको शर्त रहेको उनले बताए।
खतिवडाले पार्टीसँग बार्गेनिङ गर्ने छुट मन्त्रीहरुलाई नभएको बताएका छन्। मन्त्री फेर्ने पार्टीको निर्णयलाई चुनौती दिँदै मन्त्री तथा सांसदहरुले सामूहिक रुपमा राखेको सर्तबारे उनले यस्तो प्रतिक्रिया जनाएका हुन्।
‘त्यो सर्त गलत हो। पार्टीसँग यस प्रकारको बार्गेनिङ गर्ने छुट मन्त्रीहरुलाई छैन’, शनिबार बसेको केन्द्रीय कमिटीको बैठकपछि खतिवडाले भने।
पाँच दलिय गठबन्धनलाई उच्च प्राथमिकता दिएको तर कसैसँग शरणमा नपर्ने उनले बताए। उनले पाँच दल भन्दा बाहिरका दलहरुसँग पनि खुला छलफल गर्ने बताए।
आगामी निर्वाचनपछि भूमिका अझै बढ्ने भन्दै उनले अघिल्लो निर्वाचनमा २७ प्रतिशत स्थानमा मात्र उम्मेदवादी दिएको जानकारी दिए। उक्त अवधिमा ९ लाख मत पाएको भन्दै उनले पूरै स्थानमा उठाएको भए धेरै मत आउने विश्वास व्यक्त गरे। बैठकमा संगठन विस्तार गरेर अघि बढ्नुपर्ने निष्कर्ष निकालिएको छ।
केन्द्रीय कमिटी बैठकमा पाँच कुरा महत्वपूर्ण रुपमा उठाइएको उनले बताए। स्थानीय तहको निर्वाचनमा प्राप्त गरेको मत र कमजोरी औंल्याउँदै अघि बढ्ने उनको भनाइ छ।
आम निर्वाचनको तयारी कसरी गर्ने भन्ने विषय पनि बैठकमा अध्यक्ष माधव नेपालले प्रतिवेदन पेस गरेको उनले जानकारी दिए। केन्द्रीय परिषदको बैठकमा उक्त कुरा पेस हुने उनले बताए।
