डम्बर निदाल
डडेल्धुरा – आन्तरिक राजश्व कार्यालय डडेल्धुराले चालु आर्थिक वर्षको पहिलो चौमासिक अवधीमा साढे १२ करोड रुपैंया राजश्व संकलन गरेको छ । डडेल्धुरा सहित सुदुरपश्चिम प्रदेश अन्तर्गतका महाकाली अञ्चलमा पर्ने बैतडी र दार्चुला जिल्ला पनि कार्य क्षेत्र रहेको आन्तरीक राजस्व कार्यालयले साढे १२ करोड रुपैंया राजश्व संकलन गरेको हो ।
आन्तरिक राजस्व कार्यालय डडेल्धुराले चालु आर्थिक बर्षको पहिलो चौमासिक अवधीमा साढे १२ करोड राजश्व संकलन गरेको हो । चालु आर्थिक वर्षको चारमहिनामा १२ करोड ४४ लाख ७७ हजार ४७२ रुपैंया ७९ पैसा संकलन भएको आन्तरिक राजस्व कार्यालय डडेल्धुराले जनाएको छ ।
संकलन भएको राजस्व अन्र्तगत मूल्य अभिबृद्धि करबाट ७ करोड ५८ लाख, आयकर तर्फ ३ करोड ९७ लाख र अन्तशुल्कबाट ९० लाख गरि जम्मा १२ करोड ४४ लाख ७७ हजार ४७२ रुपैंया ७९ पैसा संकलन भएको आन्तरिक राजस्व कार्यालय डडेल्धुराले जनाएको छ । आन्तरिक राजस्व कार्यालयले चालु आर्थिक वर्षमा ३८ करोड राजस्व संकलनको लक्ष्य लिएको छ ।
वार्षिक राजश्व संकलन करिब ३८ करोड लक्ष्य लिएको कार्यालयले व्यक्तिगत वा एकलौटि फर्म, आयकर, पूँजिगत लाभकर, प्रालि दर्ता तथा ब्याज लाभांश, बहाल र आकस्मिक कर, पारीश्रमिकमा आधारित सामाजिक सुरक्षा कर, बस्तु बिक्रि तथा बितरण, परामर्श र ठेक्का, संचार बिमा हवाई तथा पर्यटन सेवा, मदिरा तथा सूर्तिजन्य पदार्थ बिक्रिबितरण र औद्योगिक उत्पादन , सरकारी प्रतिष्ठान तथा व्यक्तिगत पान दर्ता गरि जम्मा १२३७३ फर्महरुबाट २०७७ श्रावण महिना देखि कार्तिक मसान्त सम्म संकलन भएको हो ।
डडेल्धुरामा आन्तरिक राजश्व कार्यालय खुले पछि सुदूरपश्चिम प्रदेशका दार्चुला बैतडी र डडेल्धुराका करदातालाई कञ्चनपुर पुग्नु पर्ने बाध्यता हटेको मात्र छैन कार्यालयले सबै सेवाहरु ईन्टरनेट सर्भरबाट दिन थाले पछि छिटोछरितो र चाप नहुने भएकोले समयमै काम हुनेहुँदा सेवाग्रही खुशी पनि भएका छन । कर कार्यालयमा आउने सेवाग्राहीका लागि कार्यालय अगाडी खुलेका आधा दर्जन बढि अनलाईन सर्भिस फर्महरुले सेवाग्राहीलाई सहजीकरण र आवश्यक सेवासुबिधा पनि प्रदान गरेका छन । पछिल्लो समय करदाताहरुमा चेतनाको विकास हुँदै गईरहेकाले राजस्व संकलन हुन थालेको आन्तरिक राजस्व कार्यालय डडेल्धुराले जनाएको छ ।
