एक जना महिलालाई ठक्कर दिएर फरार भएका सवारी चालकलाई पाँच दिनपछि पक्राउ गरेको छ । मंसिर ५ गते बिहान काभ्रेको बनेपाबाट काठमाडौ आइरहेको प्रदेश २–०१–००१ च. ०१८० नं.को गाडीले महिलालाई ठक्कर दिएर भागेको थियो ।
प्रहरीका अनुसार बाटो क्रस गर्ने क्रममा सूर्यविनायक नगरपालिका वडा नं. ९ पलासेमा ठक्कर दिदाँ सोही स्थानकी बर्ष ६५ की ललितकुमारी कार्की गम्भिर घाइते भइन् । त्यसछि ठक्कर दिने गाडी र चालक फरार भएपछि महानगरीय प्रहरी वृत्त जगाती भक्तपुरबाट अनुसन्धान अधिकृत सहितको प्रहरी टोली खटी गई घाइतेलाई उपचारको लागी डा. ईवामुरा अस्पताल सल्लाघारी पठायो ।
थप उपचारको लागी अन्नपुर्ण न्यूरो अस्पताल काठमाडौमा रिफर भएकोमा उपचारकै क्रममा ६ गते दिउँस कार्कीको मृत्यु भएको प्रहरी परिसर भक्तपुरका सूचना अधिकारी डीएसपी दिपक गिरीले बताए । फरार रहेको सवारी र चालकको बारेमा वृत्त जगातीका प्रहरी निरिक्षक राजकुमार थापाको कमाण्डमा खटिएको अनुसन्धान टोलीले पहिचान गरेको थियो ।
ठक्कर दिएर फरार उक्त गाडीको चालक सिराहा गोलबजार बस्ने बर्ष २४ को अर्जुन वि.क. भन्ने समेत खुलेपछि ई.प्र.का. गोलबजार, सिराहासँग समन्वय गरी पक्राउ गरिएको डिएसपी गिरीले जानकारी दिएका छन् । बुधबार चालक र सवारीलाई वृत्त जगाती भक्तपुरमा ल्याई सवारी ज्यान सम्बन्धी कसुरमा थप अनुसन्धान कार्य भइरहेको प्रहरीले जानकारी दिएको छ ।