काठमाडौँ – नेपाल कम्युनिष्ट पार्टी (नेकपा)को सचिवालय बैठक दश दिनपछि भोली शनिबार बस्दै छ ।
कार्यकारी अध्यक्ष पुष्कमल दाहाल प्रचण्डले राखेको राजनीतिक प्रस्तावको जवाफमा अध्यक्ष केपी शर्मा ओलीले आफ्नो राजनीतिक प्रस्ताव राख्ने छन् ।
यही ३ मंसिरमा बसेको सचिवालय बैठकमा अध्यक्ष ओलीले आफुले राजनीतिक प्रस्ताव राख्ने जानकारी दिएपछि दश दिनपछि बस्ने गरी बैठक स्थगित भएको थियो । सचिवालय बैठकमा अध्यक्ष दाहालले अध्यक्ष ओलीप्रति गम्भीर आरोपसहित राजनीतिक प्रस्ताव राखेका छन् । अध्यक्ष दाहालले राखेको प्रस्ताव र आरोपको जवाफमा अध्यक्ष ओलीले प्रस्ताव तयार पारेको स्रोतले जनाएको छ ।
अध्यक्ष ओलीले आफु निकटका सचिवालय सदस्य, स्थायी समिति सदस्य र केन्द्रीय सदस्यहरुसँग समेत छलफल गरेर प्रस्ताव तयार पारेको स्रोतले जनाएको छ । त्यसैगरी उनले कही तटस्थ बसेका नेताहरुसँग पनि छलफल गरेका थिए ।
उनले आफ्नो प्रस्ताव बिहीबारसम्म करिव अन्तिम रुप दिएको स्रोतको भनाई छ ।
अध्यक्ष ओलीले अर्का अध्यक्ष दाहालले राखेको प्रस्तावलाई लिएर कडा रुप अपनाउने वा नरम रुप अपनाउने भन्नेबारे अझै स्पष्ट खुलि नसकेको स्रोतको भनाई छ ।
अध्यक्ष दाहाल पक्ष भने अध्यक्ष ओलीको प्रस्तावलाई अध्ययन गरेपछि आफ्नो रणनीति बुन्ने योजना रहेको छ ।
सत्तारुढ दल नेकपामा अध्यक्ष ओली पक्ष र अर्का अध्यक्ष दाहाल पक्षबीच एक अर्कामा आरोप प्रत्यारोपको क्रम निरन्तर चलिरहेको छ । दलमा दुई खेमा स्पष्ट देखिएपछि नेकपाको उच्च नेतृत्व चरम शक्ति संघर्षबाट गुज्रिरहेको छ ।
भोली शनिबार बस्ने सचिवालय बैठकमा प्रस्तुत हुने अध्यक्ष ओलीको प्रस्तावपछि उत्पन्न हुने अवस्थापछि नेकपाभित्रको अन्तरद्धन्दको दिशा के कस्तो हुने संकेत देखिने राजनीतिक विश्लेषकहरुको भनाई छ ।
