नेकपा एमालेका नेपाल र खनाल पक्षले दुई महिने ‘संगठन निर्माण र सुदृढीकरण अभियान’ सञ्चालन गर्ने निर्णय गरेको छ।
आज कलंकीको मेगा पार्टी प्यालेसमा बसेको नेपाल-खनाल पक्षको स्थायी समिति बैठकले ‘नेकपा एमालेको एकतालाई जोगाऔं,कम्युनिस्ट आन्दोलनको रक्षा गरौं’ भन्ने मूल नाराका साथ दुई महिने अभियान सञ्चालन गर्ने निर्णय गरेको सचिव योगेश भट्टराईले जानकारी दिए।
सचिव भट्टराईले दुई महिनाको अवधिमा २०७५ जेठ २ गतेसम्म कायम रहेका कमिटीहरूको पुनर्गठन, पुनःसञ्चालन, बैठक, भेला र प्रशिक्षण, छलफल लगायतका कार्यक्रम सञ्चालन गर्ने बताए।
त्यस्तै बैठकले सबै जनवर्गीय संगठनहरुलाई क्रियाशील बनाउने र आवश्यक परे पुनर्गठन गर्ने निर्णय समेत गरेको जानकारी दिए।
नेपाल–खनाल पक्षले पार्टी स्थापना दिवसको अवसर पारेर वैशाख ९ गते काठमाडौंमा, मनमोहन अधिकारी दिवसमा विराटनगर र मदन भण्डारी र जीवराज आश्रितको समृति दिवसका अवसरमा चितवनमा राष्ट्रिय स्तरको भव्य कार्यक्रम गर्ने समेत निर्णय गरेको छ।
