काठमाडौं – स्थानीय तहको निर्वाचन ३० वैशाखमा हुने भएको छ । मन्त्रिपरिषद्को अहिले बसिरहेको बैठकले ३० वैशाखमा निर्वाचन गर्ने निर्णय गरेको एक मन्त्रीले जानकारी दिए ।
निर्वाचन आयोगले एकै चरणमा गर्ने भए १४ वैशाख र दुई चरणमा गर्ने भए १४ र २२ को मिति सिफारिस गरेको थियो । तर सत्तारुढ पाँच दलीय गठबन्धनले जेठ मसान्तभित्र निर्वाचन गर्ने बताएपछि आयोगले १८ माघमा ४ जेठ प्रस्ताव गरेको थियो ।
यसअघि प्रधानमन्त्री र निर्वाचन आयोगका पदाधिकारीबीचको छलफलमा जेठ ४ गते निर्वाचन गर्ने गरी छलफल भएको थियो। तर मन्त्रिपरिषद्ले अझ अगाडिकै मिति तय गरेको हो।
स्थानीय तहको मितिका सम्बन्धमा केही समययता विवाद हुँदै आएको थियो। सत्ता गठबन्धनकै केही दलहरुले २०७९ असोजदेखि चैतसम्म निर्वाचन गर्न सकिने बताउँदै आएका थिए। तर, आमरुपमा आलोचना भएपछि गठबन्धनको बैठकमा २०७९ जेठभित्र निर्वाचन गरिसक्ने सहमति भएको थियो।
स्थानीय तहको अघिल्लो निर्वाचन तीन चरणमा भएको थियो। २०७४ वैशाख ३१, असार १४ र असोज २ मा निर्वाचन भएकाले आगामी निर्वाचन कहिले गर्दा हुने भन्ने विषयमा दलहरुबीच फरक-फरक मत देखिएको थियो।
२०७४ सालमा निर्वाचित पदाधिकारीको कार्यकाल आउँदो जेठ ५ गते सकिदै छ । प्रधानमन्त्री देउवाले आइतबार प्रमुख प्रतिपक्षी दलका नेतासमेत रहेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल प्रचण्डसँग स्थानीय चुनाव, एमसिसीलगायत विषयमा छलफल गरेका थिए।
निर्वाचन आयोगका पदाधिकारीहरूले आउँदो स्थानीय तहको निर्वाचनका लागि लाग्ने अनुमानित खर्चबारे प्रधानमन्त्री शेरबहादुर देउवालाई जानकारी गराएका छन्। मंगलबार प्रधानमन्त्रीनिवास बालुवाटारमा भएको छलफलमा आयोग पदाधिकारीहरुले स्थानीय निर्वाचनका लागि १० देखि १२ अर्ब रुपैयाँ खर्च लाग्ने बताएका हुन्।
‘निर्वाचन कहिले गर्ने र त्यसका लागि कति खर्च लाग्छ भन्ने विषयमा पनि प्रधानमन्त्रीज्यूसँग कुराकानी भयो’, छलफलमा सहभागी आयोगका एक पदाधिकारीले भने, ‘स्थानीय निर्वाचन सम्पन्न गर्न १० देखि १२ अर्ब खर्च लाग्ने आयोगको अनुमान छ। सोही व्यहोरा उहाँलाई अवगत गराएका छौं।’
आयोगले स्थानीय तहका जनप्रतिनिधिको कार्यकाल ५ जेठ २०७९सम्म मात्र रहने र त्यसअघि नै निर्वाचन गर्नुपर्ने भन्दै सरकारलाई ताकेता गर्दै आइरहेको थियो । यसअघि सोमबार कांग्रेस सभापतिसमेत रहेका प्रधानमन्त्री देउवाले पार्टीका नेताहरूसँगको भेटमा ४ जेठमै निर्वाचन हुने जानकारी गराइसकेका थिए ।
‘हामीले जेठ ४ गते नै निर्वाचन गर्नुपर्ने भनेर प्रधानमन्त्रीसमक्ष प्रस्ताव गरेका थियौं। उहाँले त्यही मिति उपयुक्त छ भन्नुभयो,’ प्रधानमन्त्रीको भनाई उधृत गर्दै प्रमुख निर्वाचन आयुक्त दिनेश थपलियाले भने, ‘उहाँले एकै चरणमा निर्वाचनको आवश्यक तयारी गर्न निर्देशन दिनुभएको छ।’
प्रधानमन्त्रीले छलफलका क्रममा निर्वाचनका लागि आवश्यक सुरक्षा व्यवस्थाको सबै तयारी गृह मन्त्रालयले गर्ने भन्दै आयोगका तर्फबाट तयारी गर्न निर्देशन दिएका हुन्।
