कपिलवस्तु – कपिलबस्तुको बिजयनगर गाउँपालिका १ मा आफ्नै ज्वाईँलाई हराउँदै ससुरा निर्वाचित भएका छन् । एमालेबाट उम्मेदवार बनेका ईन्नर थारु आफ्नै ज्वाइँ बुधराम थारुलाई ३७२ मतले हराउँदै वडाअध्यक्ष निर्वाचित भएका हुन् ।
ईन्नरले ८७३ मत पाउँदा बुधरामले ५०१ मत प्राप्त गरेका छन्। इन्नर निवर्तमान अध्यक्ष समेत ह्न्। निर्वाचन परिणामबारे निर्वाचन अधिकृतको कार्यालयले आधिकारिक घोषणा गर्न भने बाँकी नै छ । त्यस्तै भद्रपुर नगरपालिका–१ मा एमालेको प्यानलै विजयी भएको छ । वडाध्यक्षमा रामप्रसाद अधिकारी निर्वाचित भएका छन् । उनले ६६३ मत प्राप्त गरेका छन् । उनका निकटतम् प्रतिद्वन्द्वी गठबन्धनको तर्फबाट माओवादीका मेदनीप्रसाद सिवाकोटीले ५७७ मत प्राप्त गरेका छन् । यो वडामा चार जना सदस्य नै एमालेका उम्मेदवार विजयी भएका छन् ।
त्यस्तै भोजपुरको हतुवागढी गाउँपालिका वडा नम्बर ९ वडाध्यक्षमा सन्जाल राई विजयी भएका छन्। उनले कुल खसेको १०३२ मतबाट ४ सय ३८ मत ल्याई विजयी भएका हुन्। उनका निकटतम प्रतिद्वन्द्वी गठबन्धनका उम्मेदवारले ३ सय ९५ मत प्राप्त गरेका छन्।
वडा नं. ९ को मतगणना सकिएसँगै अहिले वडा नं. २ र ८ को गणना भइरहेको निर्वाचन कार्यालय घोडेटारले जनाएको छ। त्यस्तै काठमाडौंको दक्षिणकाली नगरपालिका-१ मा नेकपा एमालेको प्यानल नै विजयी भएको छ । नेपाली कांग्रेसका उम्मेदवार जयन्द्र लामालाई पराजित गर्दै एमालेका जय थापामगर वडाध्यक्ष विजयी भएका हुन् ।
एक हजार ९ मत पाएका पाएर वडाध्यक्ष जित्दा लामाले ८०५ मत मात्रै पाए । सबै वडा सदस्य पनि एमालेकै उम्मेदवार विजयी भएका छन् ।मेयरमा पनि एमालेकै अग्रता छ । कांग्रेसका मोहन बस्नेतले ९१० मत पाउँदा एमालेका श्रीराम आचार्यले ९१३ मत पाएका छन् ।
उपमेयर भने कांग्रेसको अग्रता छ । कांग्रेसका उम्मेदवार बसन्ती तामाङले ७७८ मत ल्याउँदा एमालेका इन्दिरा न्यौपानेले ८६४ मत ल्याएकी छन् । यसअघि काठमाडौंको बुढानिलकण्ठ नगरपालिका वडा नम्बर १ को वडा अध्यक्षमा एमालेका उम्मेदवार विजयी भएका थिए ।
वडाध्यक्षमा एमालेका सुरेन्द्र लामा ८४५ मतसहित बिजयी हुँदा कांग्रेसका उम्मेदवार ४५३ मतमा रोकिएका थिए । मेयरमा एमालेका मिठाराम अधिकारीले ७७८ मत पाएका छन् भने कांग्रेसका बिनोद चालिसेले ४२८ मत पाएका थिए ।
त्यस्तै उपमेयरमा एमालेकी अनिता लामा ८१२ मतसहित अग्रस्थानमा रहँदा कांग्रेसकी उम्मेदवारले ४५३ मत पाएका छन् । यो नगरपालिकामा मेयर उपमेयरसहित सबै पदमा एमालेका उम्मेदवारले अग्रता कायम गरेर हुन् । अहिले पनि बुढानिलकण्ठ नगरपालिकामा मतगणना चलिरहेको छ ।
बुढानिलकण्ठ नगरपालिकामा मेयर पदका लागि नेकपा एमालेबाट मिठाराम अधिकारी, नेपाली कांग्रेसबाट विनोद चालिसे नेकपा माओवादी केन्द्रबाट डम्बर प्रसाद अधिकारी, लोकतान्त्रिक समाजवादी पार्टी नेपालबाट सिता राम विश्वकर्माले उम्मेदवारी दिएका छन् ।
