काठमाडौं। भारतीय सशस्त्र सीमा बल (एसएसबी) का प्रमुख सुजोय लाल थाओसेन नेपाल भ्रमणमा आउने भएका छन्। उनी अर्को साता नेपाल आउने परराष्ट्र स्रोतले जनाएको छ।
नेपालको सशस्त्र प्रहरी (एपीएफ) र एसएसबीबीच आयोजना हुन लागेको वार्षिक समन्वय बैठकमा भाग लिन थाओसेन आउन लागेका जनाइएको छ
बैठक असोज ५ देखि ७ गतेसम्म काठमाडौँमा आयोजना हुनेछ। बैठकमा सीमा अपराध नियन्त्रण, एपीएफ र एसएसबीबीच सूचना आदानप्रदान लगायत अन्तरदेशीय सीमा सुरक्षाका सबै विषयमा छलफल हुने भएको छ।
बैठकमा नेपालका तर्फबाट एपीएफका महानिरीक्षक राजु अर्यालले टोलीको नेतृत्व गर्ने छन् भने एसएसबीका प्रमुख थाओसेनले भारतीय टोलीको नेतृत्व गर्नेछन्।
नेपाल र भारतका सीमा सुरक्षा बलबीच छैटौँ बैठक हुन लागेको हो। यसअघि सन् २०२१ को अगस्टमा भारतको नयाँ दिल्लीमा पाँचौँ बैठक आयोजना भएको थियो। सो बैठक भारतमा भएको थियो। बैठकमा भाग लिन नेपालबाट अघिल्ला आइजीपी भारत गएका थिए।
