जसपा केन्द्रीय सदस्य एवं निवर्तमान सांसद अमृता अग्रहरि नेकपा एमाले प्रवेश गरेकी छन् । एमाले अध्यक्ष केपी शर्मा ओलीको निवास बालकोट पुगेर अग्रहरि पार्टी प्रवेश गरेकी हुन् ।
जसपामा पछिल्लो समय अध्यक्ष उपेन्द्र यादवसँग असन्तुष्ट रहँदै आएकी अग्रहरिले चुनावको मुखमा एमाले रोजेकी हुन् ।
‘जनता समाजवादी पार्टीका केन्द्रीय कार्यकारी समितिका सदस्य, निवर्तमान प्रतिनिधिसभा सदस्य तथा चर्चित महिला नेत्री अमृता अग्रहरिलाई नेकपा (एमाले) मा हार्दिक स्वागत छ,’ एमाले उपाध्यक्ष विष्णु पौडेलले ट्विटरमा लेखेका छन् ।
नेपालको लोकतान्त्रिक आन्दोलनका नेता गजेन्द्र नारायण सिंहको प्रेरणाबाट राजनीतिमा कृयाशिल रहेको बताउने कपिलवस्तीकी अग्रहरि निवर्तमान सांसद समेत हुन् ।
केही दिनअघि जसपाकी अर्की नेतृ रुही नाज पनि एमाले प्रवेश गरेकी थिइन्। एमाले अध्यक्ष ओलीले जनकपुरमा आयोजित जनसभा एवं पार्टी प्रवेश कार्यक्रममा उनलाई पार्टी प्रवेश गराएका थिए। नेतृ रुही नाज पनि निवर्तमान प्रतिनिधिसभा सदस्य हुन्।
