काठमाडौंमा एक कार्यक्रमका बीच रवीन्द्र मिश्र राप्रपा प्रवेश गरेका छन् । राप्रपाको वरिष्ठ उपाध्यक्ष हुनेगरी उनी बुधबार उनी राप्रपा प्रवेश गरेका हुन् । राप्रपा प्रवेश गर्नेक्रममा सम्बोधन गर्दै कांग्रेसको आलोचनामा उत्रिए ।
उनले भने, ‘कांग्रेसका मित्रहरूलाई भन्छु, अहिले डेंगीले अस्पतालका बेडहरू भरिएका छन् । मानिसहरू मरिरहेका छन् । तपाईंहरूका नेतालाई सोध्नुहोस् तपाईंहरू बिरामीसँग हुनुहुन्छ कि तपाईंका कार्यकर्ताको घाँटी रेट्नेहरूसँग हुनुहुन्छ ?’
मिश्र कांग्रेसको आलोचना गर्नेक्रममा यतिमा रोकिएनन् । माओवादीसँग गठबन्धन गरेको तर्फ इंगित गर्दै उनले भने, ‘घरमा चार तारे झण्डा राखेवापत मार्नेहरूसँग तपाईंहरूसँगै हिँड्दा प्रतिगमन नहुने, मैले राजतन्त्र पुनःथापना गर्नुपर्छ भन्दा प्रतिगमनकारी भएँ ?’
राप्रपाका विषयमा बोल्दै उनले राप्रपालाई २१ औं शताब्दिमैत्री पार्टी बनाउनुपर्ने बताए । उनले सूचना प्रविधिमैत्री र अहिलेको समयअनुसार पार्टीलाई चुस्त बनाउनुपर्ने बनाउनुपर्ने बताए ।
उनले संवैधानिक राजस्ंस्था स्थापना, धर्मनिरपेक्ष खारेज र संघीयता खारेजमा लामो समय खर्चिए । उनले आफू नरम दक्षिणपन्थ भएको दाबी गर्दै आफू पश्चगामी नभएको तर्क गरे । उनले दक्षिणपन्थ उग्र भए मात्र पश्चगामी हुने बताए ।
त्यस्तै उनले राप्रपाले बोकेको एजेण्डा पश्चगामी छ भन्ने भाष्य गलत भएको दावी गरेका छन् । मिश्रले यो देशमा बढेको विकृतिको जडलाई तोड्न राप्रपाले बोकेको एजेण्डा सहि भएको बताए । उनले ठुला भनिएका राजनीतिक पार्टीहरुले दशकौंदेखि देशमा भ्रष्टाचार, वेथिती र समाजमा अत्याधिक राजनीति भित्र्याएर जडता लादिएको बताए ।
‘यो देशमा धेरै लामो समय विकृतिबाट गाँजियो । नियतिले तपाई र मेरो पुस्तालाई मात्र रजाई गर्न दिएको होइन यो देश’, मिश्रले आफ्नो मार्ग परिवर्तन र राप्रपासँगको मिलनबारे भने, ‘राप्रपाले बोकेको एजेण्डा पश्चगामी छ भन्ने भाष्य गलत छ ।’ उनले ठुला पार्टीले देशका लागि राजनीति नभएकै कारण स्रोत साधन भएको देश बिग्रिएको बताए । उनले भूराजनीतिको फाइदा उठाउँदै धर्म परिवर्तनजस्ता विषयहरु गम्भीर बन्दै गएको बताए । उनले संघीयता धान्न नसक्ने भन्दै राजसंस्था नै देशका लागि उपयुक्त हुने बताए ।
‘हाम्रो जस्तो राजनीति भएको देशमा संघीयता चाहिँदैन, आर्थिक हिसाबले पनि थेग्न सकिँदैन’, मिश्रले नेपाली कांग्रेसका नेताहरुलाई प्रश्न गर्दै भने, ‘२०४६ पछि ममा विचलन आयो कि तपाईको पार्टीका नेतामा विचलन आयो ?’ उनले वीपीको मेलमिलापको नीति अहिले राप्रपाले बोकेको तथा गणेशमान र कृष्णप्रसाद भट्टराईलाई रुवाएर पार्टी छोड्न लाउने कांग्रेसहरु कसरी अग्रगामी हुन सक्छन् भन्दै प्रश्न गरे । उनले राप्रपालाई १ नम्बरको पार्टी बनाएर छोड्ने भन्दै कमजोरी सच्याउँदै सबैको साथ र सहयोगको अपेक्षा गरे ।
मिश्रले विवेकशील साझाबाट राप्रपामा आफु एक्लै नआएको भन्दै सातै प्रदेशका तह र तप्काका साथीहरु समावेश भएको बताए । त्यसक्रममा उनले राप्रपालाई २१ शताब्दी मैत्री बनाउने प्रयास गर्नुपर्ने भन्दै आउँदो चुनावमा राप्रपा शसक्त रुपमा संसद प्रवेश गर्ने योजना रहेको बताए । उनले देशमा संवैधानिक राजसंस्था आवश्यक भएको भन्दै संघीयता खारेजी र धर्मनिरपेक्ष खारेज गर्ने अभियानमा लाग्ने बताए ।
