चितवन क्षेत्र नम्बर २ मा राष्ट्रिय स्वतन्त्र पार्टीकाका रबि लामिछानेले एमाले र कांग्रेसका उम्मेदवारलाई उछिनेका छन्।
प्रतिनिधि सभाको प्रत्यक्षतर्फ रवि लामिछाने (घन्टी)ले ३९४९, कृष्ण भक्त पोख्रेल (सुर्य) ले २७१२ र उमेश श्रेष्ठ (रुख) ले ३१७७ मत प्राप्त गरेका छन्।
त्यस्तै, तीन निर्वाचन क्षेत्र रहेको चितवनमा राष्ट्रिय स्वतन्त्र पार्टी प्रभावशाली रूपमा अगाडि आएको छ। यहाँ स्वतन्त्र पार्टीका उम्मेदवारहरूले पुराना राजनीतिक दललाई कडा चुनौती दिइरहेका छन्।
चितवन क्षेत्र नम्बर १ मा राष्ट्रिय स्वतन्त्र पार्टीका हरि ढकालले नेपाली कांग्रेसका विश्व पौडेललाई १२ सयभन्दा बढी मतले पछि पारेका छन्।
पछिल्लो परिणामअनुसार घन्टी चिह्न लिएर चुनाव लडिरहेका स्वतन्त्र पार्टीका हरि ढकालले ५०९८ मत ल्याएका छन्। उनलाई पछ्याइरहेका कांग्रेसका विश्व पौडेलले ३८८४ मत ल्याएका छन्। उनीहरूबीच १२१४ मतको अन्तर छ।
यहाँ नेकपा एमालेका उपाध्यक्ष सुरेन्द्र पाण्डे तेस्रो स्थानमा छन्। उनले ३८८० मत ल्याएका छन्।
उता, प्रतिनिधिसभा निर्वाचनको समानुपातिकतर्फ नेकपा एमालेले अग्रता लिएको छ । दोस्रो स्थानमा कांग्रेस रहँदा तेस्रो स्थानमा नवगठित राष्ट्रिय स्वतन्त्र पार्टी देखिएको छ ।
नेकपा माओवादी केन्द्र चौंथौ स्थानमा रहेर रवि लामिछाने नेतृत्वको स्वतन्त्र पार्टीसँग संघर्ष गरिरहेको छ ।
निर्वाचन आयोगका अनुसार अहिलेसम्म एमालेले ५१ हजार २ सय ४०, नेपाली कांग्रेसले ४५ हजार ४ सय ७, राष्ट्रिय स्वतन्त्र पार्टीले २१ हजार ४ सय ३८ र नेकपा माओवादी केन्द्रले २० हजार १ सय ९२ मत पाएका छन् ।
राष्ट्रिय प्रजातन्त्र पार्टीले ९ हजार ९ सय ६७ मत पाएको छ ।
