नेपाली कांग्रेसका नेता प्रदीप पौडेलले काठमाडौं क्षेत्र नम्बर ५ बाट आफ्नो जित पक्का गरेका छन् । एमालेका हेभिवेट नेता तथा वरिष्ठ उपाध्यक्ष ईश्वर पोखरेलविरुद्ध उनले सहज जित निकालेका हुन् ।
अघिल्लो चुनावमा तनहुँबाट प्रदेशसभामा लडेका पौडेल माओवादी केन्द्रकी आशा कोइरालासँग ११ मतले पराजित भएका थिए ।
वाम गठबन्धनकी उम्मेदवार कोइरालासँग पराजित भएपछि पौडेलले मतदानको क्रममा धाँधली भएको भन्दै पुनः मतदान गराउन माग गर्दै मुद्दा हालेका थिए । पौडेलले हालेको उक्त मुद्दाको छिनोफानो अहिलेसम्म भइसकेको छैन ।
तर, आइतबार सम्पन्न निर्वाचनमा काठमाडौं ५ बाट उम्मेदवार बनेका पौडेलले एमालेका वरिष्ठ उपाध्यक्ष ईश्वर पोखरेललाई भारि मतान्तरले पराजित गरेका छन् ।
विद्यार्थी राजनीतिबाट उदाएका पौडेल कांग्रेसको १४औँ महाधिवेशनमा महामन्त्रीका उम्मेदवार थिए । तर त्यसबेला उनी गगन थापा र विश्वप्रकाश शर्मासँग पराजित भएका थिए ।
काठमाडौं ५ बाट अघिल्लो चुनावमा ईश्वर पोखरेलले कांग्रेसका डा. प्रकाशशरण महतलाई पराजित गरेका थिए । तर, यसपटक भने कांग्रेसका युवा उम्मेदवार पौडेलसँग पोखरेल पराजित भएका हुन् ।
