काठमाडौं – बाजुरामा नेपाली कांग्रेसका उमेदवार बद्री पाण्डेले अग्रता कायमै राखेका छन् । सुरुदेखि नै अगाडि रहेका पाण्डेले पाँच हजार ४१९ मत ल्याएका छन् ।
उनलाई पछ्याइरहेका नेकपा (एमाले)का उमेदवार कर्णबहादुर थापाले चार हजार १२९ मत ल्याएका छन् । उनीहरूबीच एक हजार २९० को मतान्तर छ ।
उता, दोलखामा गत मंसिर ४ गते भएको संसदीय निर्वाचनको मतगणना हिजो रातिदेखि जारी छ । निर्वाचन आयोगबाट प्राप्त पछिल्लो मत परिणामअनुसार दोलखामा सत्ता गठबन्धनका तर्फबाट उमेदवार रहेका नेकपा (माओवादी केन्द्र)का गंगा कार्कीले अग्रता कायम गरेका छन् ।
कार्कीले अहिलेसम्म एक हजार ६५४ मत पाएका छन् । उनका निकटतम प्रतिस्पर्धी नेकपा (एमाले)का बालकृष्ण सिवाकोटीले ९११ मत पाएका छन् । यस्तै, राष्ट्रिय स्वतन्त्र पार्टीका जगदीश पोखरेलले ११८ मत पाएका छन् ।
त्यस्तै, स्याङ्जा–२ मा नेपाली कांग्रेसका उमेदवार धनराज गुरुङले अग्रता कायमै राखेका छन् । निर्वाचन आयोगबाट प्राप्त पछिल्लो मत परिणामअनुसार गुरुङले ११ हजार ९२० मत पाएका छन् ।
उनलाई पछ्याइरहेकी नेकपा (एमाले)की उमेदवार पद्मा अर्यालले नौ हजार ५०१ मत पाएकी छन् । अर्यालले यसअघि सार्वजनिक मत परिणामको तुलनामा मतान्तर घटाएकी छन् । अहिले अर्याल गुरुङभन्दा दुई हजार ४१८ मतले पछाडि छन्।
राष्ट्रिय स्वतन्त्र पार्टीका टिकराज गुरुङले पाँच हजार १९२ मत ल्याएका छन् ।
