प्रतिनिधिसभा सदस्य र प्रदेशसभा सदस्य निर्वाचनको मतगणना जारी रहेको स्याङ्जा क्षेत्र नम्बर–२ मा दुवैमा नेपाली कांग्रेसका उमेदवारले अग्रता बढाउँदै लगेका छन् ।
जिल्ला निर्वाचन कार्यालयका अनुसार प्रतिनिधिसभा सदस्यमा कांग्रेस उमेदवार धनराज गुरुङले अग्रता बढाउँदै लगेका छन् । गुरुङ निकटतम प्रतिस्पर्धी नेकपा (एमाले)की उमेदवार पद्माकुमारी अर्यालभन्दा चार हजार ६३१ मतले अगाडि छन् ।
हालसम्मको मतगणनाअनुसार गुरुङले २७ हजार ३२ मत प्राप्त गर्दा अर्यालले २२ हजार ४०१ मत ल्याएकी छन् । यस्तै, राष्ट्रिय स्वतन्त्र पार्टीका टिकराज गुरुङले सात हजार ६६२ मत प्राप्त गरेका छन् ।
हालसम्म स्याङ्जाको गल्याङ नगरपालिका–११, भिरकोट नगरपालिका–५, वालिङ नगरपालिका–१२, कालीगण्डकी गाउँपालिका–७ तथा चापाकोट नगरपालिकाका चार वडा गरी ३९ वडाको मगतणना सकिएको छ । अब चापाकोट नगरपालिका–५, ६, ७, ८, ९ र १० को मतगणना मात्र बाँकी रहेको निर्वाचन कार्यालयले जनाएको छ । रासस
यस्तै, स्याङ्जा क्षेत्र नम्बर–२ ‘ख’मा कांग्रेस उमेदवार महेश भट्टराईले अग्रता बढाउँदै लगेका छन् छ । चापाकोट नगरपालिका–४ वडासम्मको मतगणना सकिँदा भट्टराई एक हजार ९६६ मतान्तरसहित अगाडि छन् । भट्टराईले १४ हजार ७१५ मत प्राप्त गर्दा एमाले उमेदवार बुद्धिमान श्रेष्ठले १२ हजार ७४९ मत ल्याएका छन् ।
त्यस्तै, दोलखाबाट माओवादी केन्द्रका उम्मेदवार गंगा कार्कीले अग्रता कायमै राखेका छन्। उनी एमालेका उम्मेदवार बालकृष्ण सिवाकोटीभन्दा १ हजार २ सय ६० मतले अघि छन्।
माओवादी केन्द्रका कार्कीले १० हजार ७ सय ३७ मत ल्याउँदा एमालेका सिवाकोटीले ९ हजार ४ सय ७७ मत ल्याएका छन्। दोलखामा ४ मतदानस्थलका १० वटा मतदान केन्द्रमा मंसिर १५ मा पुन: मतदान भएको थियो। मतदान सकिएपछि बिहीबारदेखि गणना प्रारम्भ भएको थियो।
त्यस्तै, बाजुराको प्रतिनिधिसभाको मतगणना छ। पछिल्लो मतपरिणामअनुसार प्रतिनिधिसभामा नेपाली कांग्रेसका उम्मेदवार बद्री पाण्डेले फराकिलो मतान्तर बनाएका छन्।
मुख्य निर्वाचन अधिकृतको कार्यालयका अनुसार २३ हजार सात सय चार मतगणना गर्दा पाण्डेले १२ हजार सात सय पाँच मत प्राप्त गरेका छन्। उन निकटतम प्रतिद्वन्द्वी नेकपा (एमाले)का उम्मेदवार कर्णबहादुर थापाले १० हजार ५९ मत ल्याएका छन्।
एमालेका उम्मेदवार थापाको गृहनगर बूढीगङ्गा नगरपालिका, त्रिवेणी नगरपालिका र स्वामीकार्तिक खापर गाउँपालिकाको मतगणना भइरहेको मुख्य निर्वाचन अधिकृतको कार्यालय बाजुराले जनाएको छ।
