काठमाडौँ – क्यामेलिया सेकेण्डरी स्कुलमा अवाकस प्रतियोगिता सम्पन्न गरिएको छ । काठमाडौँको कालिमाटीमा रहेको उक्त स्कुलमा बुधबार एक कार्यक्रमको आयोजना गरी सम्पन्न गरिएको हो ।
कार्यक्रममा ५ देखि ७ कक्षासम्मका विद्यार्थीहरुको सहभागिता रहेको थियो । प्रतियोगितामा छानिएका विद्यार्थीहरुले राष्ट्रिय तथा अन्तराष्ट्रिय प्रतिगोगितामा सहभागी हुन पाउने छन्। विद्यालयले उक्त विषयलाई यहि बर्षदेखि बैकल्पिक विषयका रुपमा पठन पाठन गराउँदै आएको छ ।
कार्यक्रममा बोल्दै क्यामेलिया सेकेण्डरी स्कुलका प्रधानाध्यापक रुद्रमणी अधिकारीले अवाकसमा विद्यार्थीले गरेको प्रगति देखेर आफू अत्यन्तै खुसी भएको बताए। उनले विद्यार्थी र अभिभावकले पनि यो शिक्षा मन पराएको भन्दै आगामी शैक्षिक सत्रबाट १ देखि ७ कक्षासम्म नै यस प्रणालीलाई पठन पाठन गराउने समेत प्रतिबद्धता जनाए ।
त्यस्तै, सहायक प्रधानाध्यापकले मोजराज भट्टले क्यामेलिया स्कुल पढाइसंगै अतिरिक्त क्रियाकलाप पनि उत्कृष्ट रहेको बताए। ‘आजको प्रतियोगितामा अवाकस प्रणालीबाट विद्यार्थीहरूले गणितीय समस्या समाधान गरेको देख्दा राम्रै ज्ञान हासिल गरेका रहेछन भन्ने लाग्यो ।”, उनले भने।
त्यसैगरी, अवाकसले बालबालिकाको ध्यान केन्द्रित गर्न धेरै सहयोग गरेको अभिभावकहरुले बताए । उनीहरुले आजको कार्यक्रममा आफ्ना बालाबालिकाले अवाकस प्रणालीबाट छिटो छरितो तरिकाले गणितीय समस्या समाधान गरेको प्रत्यक्ष देख्न पाउँदा झन् धेरै अवाकस सम्बन्धि जानकारी पाएको भन्दै खुसी व्यक्त गरे।
शैक्षिक क्षेत्रमा नयाँ प्रयोग गरिएको अवाकसले बालबालिकाको मष्तिस्क विकास, गणितीय समस्या समाधान गर्न सहज, ध्यानलाई केन्द्रिकृत गराउने गर्दछ । विश्वका १ सय ५० भन्दा बढी देशमा यसको प्रयोग भइरहेको छ ।
विश्वमा २ हजार बर्ष पहिले नै यसको प्रयोग गरिएको पाइए पनि नेपालमा बालविकास एनसीमासले १८ वर्षदेखि गर्दै आएको छ । धेरै जसो विद्यालयहरुले यस अवाकस प्रणालीलाई नियमित पाठ्यक्रममा समाबेश गरी अध्यापन गराउँदै आएका छन्।
