सशस्त्र प्रहरी बलले भूकम्प प्रभावित क्षेत्र जाजरकोट र रुकुम पश्चिममा खटिएर अन्य सुरक्षा निकाय र स्थानीयको सहकार्यमा खोज तथा उद्धार जारी राखेको जनाएको छ।
परिचालित फौजले मृतकको शव तथा घाइतेहरुको उद्धार गरी अस्पताल पठाउने काम गरिरहेको सशस्त्र प्रहरीले जानकारी दिएको छ ।
गए राति ११ः४७ बजे जाजरकोटको बारिकोट गाउँपालिका-१, रामीडाँडा केन्द्रबिन्दु बनाएर ६ दशमलव ४ रेक्टर स्केलको भूकम्प गएलगत्तै प्रभावित इलाकामा सशस्त्र प्रहरी खटिएको छ।
अहिलेसम्म जाजरकोटमा ९२ र रुमुकपश्चिममा ६२ जनाको मृत्यु भएको छ भने त्यतिकै संख्यामा घाइतेहरु रहेका छन् ।
भूकम्पमा परी गम्भीर घाइते भएका रुकुमपश्चिमका तीन जनाको हेलिकप्टरबाट उद्धार गरिएको छ । उनीहरूलाई नेपाली सेनाको हेलिकप्टरबाट प्रदेश अस्पताल सुर्खेत ल्याइएको हो ।
रुकुमपश्चिको आठबीसकोट नगरपालिकामा ५२ जनाको मृत्यु भएको छ भने आठबीसकोटमा ६० जना घाइते भएका छन् । तीमध्ये गम्भीर ३ जनालाई उद्धार गरी कर्णाली प्रदेश अस्पताल सुर्खेत ल्याइएको छ ।
सशस्त्र प्रहरीले २१ जनाको जिवितै उद्दार गर्न सफल भएको छ। उद्दारको लागि गृहमन्त्रालयको निर्देशनमा छिमेकी जिल्लाहरुबाट पनि सुरक्षाकर्मी परिचालन गरिसकिएको छ। काठमाडौंबाट सशस्त्र प्रहरीको मेडिकलसहितको टोली जाजरकोट उडेको छ।
सशस्त्रको अस्पतालबाट सप्रनाउ डा. रोशन पराजुलीको कमाण्डमा ९ जनाको टोली मेडिकल सामाग्री सहित सेनाको स्काई ट्रकमार्फत पश्चिम रुकुमको चौरजहारी उडेका छ।
प्रभावित इलाकामा ठूलो संख्यामा सशस्त्र प्रहरी खटिएको सशस्त्रका सहप्रवक्ता तथा डीएसपी शैलेन्द्र थापाले बताए।
