काठमाडौं — फरक आवाजकी धनी तथा करिब १८ वर्षदेखि नेपाली गीत–संगीत क्षेत्रमा सक्रिय गायिका कला लम्सालले आफ्नो नयाँ गीत ‘मायाको झल्को’ सार्वजनिक गरेकी छन्। सार्वजनिक भएसँगै गीतले युट्युब र सामाजिक सञ्जालमा श्रोता–दर्शकको उल्लेखनीय ध्यान तान्न थालेको छ।
गीतमा कला लम्सालसँगै गायक बसन्त थापाको स्वर रहेको छ। यसका शब्द तथा संगीत रामेश परियारले तयार गरेका हुन्। प्रेम र भावनालाई सरल तर मार्मिक ढंगले प्रस्तुत गरिएको गीतले श्रोतामाझ सकारात्मक प्रतिक्रिया पाइरहेको छ।
गीतको म्युजिक भिडियोमा कला लम्साल स्वयं र गम्भीर बिष्टको अभिनय देख्न सकिन्छ। भिडियोले पनि दर्शकको मन जित्न थालेको छ।
यसअघि कला लम्सालको चर्चित गीत ‘अन्टि लभर’ ले युट्युबमा केही महिनामै करिब २ करोड ७० लाख पटक हेरिने कीर्तिमान बनाएको थियो। उक्त गीतमा उनले आफैं अभिनय गरेकी थिइन्, जसले उनको लोकप्रियतालाई थप मजबुत बनाएको छ।
लम्सालले यसअघि ‘छड्के तिलरी’, ‘धानको चामल’, ‘धानेको चिउरा’ र ‘पातली, हेर्न मनाइन्छ’ जस्ता चर्चित गीतहरू गाइसकेकी छन्। नयाँ गीत ‘मायाको झल्को’ ले पनि उनको संगीत यात्रालाई थप उचाइ दिने अपेक्षा गरिएको छ।
हेर्नुस् भिडियो
