काठमाडौंको बालाजु बाइसधारामा आज परम्परागत मेला लागेको छ। प्रत्येक वर्ष चैत शुक्ल पूर्णिमाका अवसरमा आयोजना हुने यस मेलामा स्नान गर्न हिन्दु तथा बौद्ध धर्मावलम्बीहरू ठूलो संख्यामा सहभागी हुने गरेका छन्।
धार्मिक विश्वासअनुसार बाइसधारामा स्नान गरेमा मुक्तिनाथ मन्दिर तथा गोसाईंकुण्ड मा स्नान गरेसरह पुण्य प्राप्त हुने मान्यता रहेको छ। यही आस्थाका कारण आज बिहानैदेखि श्रद्धालुहरू बाइसधारामा पुगेर स्नान तथा पूजा–आराधना गरिरहेका छन्।
मेलाले धार्मिक आस्था मात्र नभई स्थानीय संस्कृति, परम्परा र सामुदायिक जमघटलाई समेत झल्काउने गरेको छ।
