डम्बर निदाल
डडेल्धुरा -डडेल्धुराको अमरगढी नगरपालिकाले नगर क्षेत्रभित्रका विद्यालय समायोजन गरेको छ । शैक्षिक गुणस्तर सुधारका लागि नगरपालिकाले नगर क्षेत्रभित्रका मापदण्डअनुरुप न्यूनतम विद्यार्थी संख्या नपुगेका विद्यालय अन्य विद्यालयमा गाभी समायोजन गरेको हो ।
नगर उपप्रमुख संगिता भण्डारीको संयोजकत्वमा सामुदायिक विद्यालयको दरबन्दी मिलान तथा विद्यालय समायोजन सुझाव समितिले स्थलगत अनुगमन र सरोकारवालाहरुसँगको छलफल पश्चात नगर कार्यपालिकामा बुझाएको प्रतिवेदनका आधारमा विद्यालय समायोजनको निर्णय भएको नगरप्रमुख विशेश्वर प्रसाद ओझाले बताए । उक्त समितिले समायोजन गरिएका विद्यालयको पछिल्लो ३ वर्षको विद्यार्थी संख्या सम्बन्धी तथ्यांक विश्लेषणको आधारमा शैक्षिक गुणस्तर सुधारका लागी विद्यालय समायोजन गर्ने निर्णय गरेको थियो ।
नगरपालिकाको सामुदायिक विद्यालय समायोजन कार्यविधी २०७७ अनुसार कैलपाल प्राथमिक विद्यालय झर्तालाई सहश्रलिङ माध्यामिक विद्यालय राईमा गाभिएको र सहश्रलिङ माध्यामिक विद्यालयको प्रारम्भिक बाल बिकास कक्षा लाई र कक्षा १ को बिस्तारित कक्षालाई कैलपाल प्राबिको भवनमा संचालन गर्ने गरी समायोजन गरेको छ ।
यसैगरी भुमिराज प्राबि शान्तिनगर ढुनढुने लाई हालकायम रहेको कक्षा १—४ वाट १—३ गर्ने र कक्षा ४ लाई बैजनाथ माबि मौराडामा गाभी समायोजन गरीएको छ । जनज्योती प्राबि आदित्यपुर लाई हाल कायम रहेको प्रारम्भिक बाल कक्षा—५ वाट ०—३ कायम गरी कक्षा ४ र ५ लाई त्रिपुरा सुन्दरी आबि बिरखम्बमा समायोजन गरेको छ । जनसेवा प्राबि डाँडाकोट लाई हाल कायम रहेको बाल कक्षा—५ वाट ०—३ कायम गरी कक्षा ४ र ५ लाइ घटाल माबि नुवाकोटमा गाभी समायोजन गरीएको छ ।
असिग्राम प्राबि सुनेडा लाई हाल कायम रहेका बाल कक्षा—५ वाट ०—३ कायम गरी कक्षा ४ र ५ लाई बैजनाथ आबि भलियामा गाभी समायोजन गरीएको छ । पूर्णागिरी प्राथमिक विद्यालय जिलोडालाई असिग्राम प्राथमिक विद्यालय सेलागाउँमा गाभिएको र कक्षा ०—५ वाट कक्षा ०—३ गर्ने र कक्षा ४र ५ लाई भुमिराज प्राबि बागचौरमा गाभी समायोजन गरेको छ । साथै पुर्णागिरी प्राबिको भवनमा असिग्राम प्राबि सेलागाउँको प्रारम्भिक बाल शिक्षा कक्षाको बिस्तारीत कक्षा संचालन गर्ने र बिशेष शिक्षाको कक्षा लाई समेत सोही भौतिक संरचनामा संचालन गर्ने गरी समायोजन गरेको नगरपालिका शिक्षा शाखाले जानकारी दिएको छ ।
यसैगरी शैलेश्वर महादेव प्राबि तिलाडी लाई हाल कायम रहेको कक्षा ०—५ वाट कक्षा ०—३ गर्ने र कक्षा ४र ५ लाई उग्रतारा माबि पोखरामा गाभी समायोजन गरीएको छ । यसैगरी गणेशमान स्मृति दुमडा, माहेश्वरी प्राबि निदालगाउँ लाई शैक्षीक गुणस्तर बृद्धिमार्फत बिधार्थी संख्या बढाउने शर्त तोकी हाल लाई साविक बमोजिम नै कक्षा ०—५ संचालन गर्ने र बिधार्थी संख्या बृद्धि नभए अर्को पटकको समायोजनमा कक्षा वा तह कटौती गर्ने जनाएको छ ।
बैजनाथ आबि भलिया र त्रिपुरा सुन्दरी आबि बीरखम्ब लाई पनि पनि शैक्षीक गुणस्तर बृद्धिमार्फत बिधार्थी संख्या बढाउने शर्त तोकी हाल लाई साविक बमोजिम नै कक्षा ०—८ संचालन गर्ने र बिधार्थी संख्या बृद्धि नभए अर्को पटकको समायोजनमा कक्षा वा तह कटौती गर्ने जनाएको छ ।
बालविकास कक्षादेखि ५ कक्षा सञ्चालन भएका विद्यालयले शैक्षिकसत्र २०७७ देखि कक्षा ४ र ५ मा भर्ना लिन नपाउने भएका छन् । उनीहरूले अब बालविकास कक्षादेखि ३ को मात्रै पठनपाठन गर्न पाउने नगरपालिकाका शिक्षा शाखा प्रमुख हेमन्तराज पन्तले बताए । जसमा भरर्खरै समायोजन भएका विद्यालय रहेको शिक्षा शाखा प्रमुख पन्तले बताए ।
साथै कार्यपालिका बैठकले विद्यालयको शिक्षक दरबन्दी मिलानको कार्य तत्काल प्रारम्भ गर्ने तथा दरबन्दी मिलानको कार्य सम्पन्न नहुँदासम्म शिक्षक सरुवा र नियुक्ति सम्बन्धी सम्पूर्ण कार्य रोक्ने निर्णय समेत गरेको नगरपालिकाको शिक्षा शाखाले जनाएको छ ।
