डम्बर निदाल
डडेल्धुरा – नेपाली कांग्रेस डडेल्धुराले नयाँ क्रियासिल सदस्यता बितरण गर्न थालेको छ । पार्टीका सभापति तथा पुर्वप्रधानमन्त्री शेरबहादुर देउवाको वडाबाट नयाँ क्रियासिल सदस्यता वितरण कार्य शुरु गरेको हो ।
सोमबार नेपाली कांग्रेस डडेल्धुराका सभापति तथा सुदूरपश्चिम प्रदेश सभाका सदस्य कर्णबहादुर मल्लले स्थानिय धौलीदेवी सार्कीलाई पहिलो नयाँ क्रियासिल सदस्यता प्रदान गरेर जिल्लाव्यापी रुपमा नयाँ क्रियासिल सदस्यता वितरण कार्यको शुभारम्भ गरेका छन् । नेपाली कांग्रेस केन्द्रिय कमिटीको निर्देशन अनुसार जिल्ला कार्य समितिले सोमबार देखि नयाँ क्रियासिल सदस्य दिन शुरुवात गरेको छ । पुराना सदस्यहरुको नविकरण गर्ने कार्य सकिए पछि नयाँ सदस्य बाँड्न थालेको नेपाली कांग्रेस डडेल्धुराले जनाएको छ ।
कांग्रेस पार्टीका केन्द्रिय सभापती एवं पुर्व प्रधानमन्त्री शेर बहादुर देउवाको गाउँ गन्यापधुरा गाउँपालिका–१ रुवाखोला बाट नयाँ सदस्यता बितरण शुरुवात गरिएको नेपाली कांग्रेसले जनाएको छ । रुवाखोलामा आयोजित कार्यक्रममा वडास्तरमा क्रियासिल कार्यकर्ताहरुका साथै जिल्ला स्तरीय नेताहरु सहभागी थिए । यस अघि कांग्रेसले जिल्लाभरका क्रियासिल सदस्यता नविकरण गरिसकेको छ । गन्यापधुरा गाउँपालिका–१ का ८४ जनालाई नयाँ क्रियासिल सदस्यता प्रदान गरेको नेपाली कांग्रेस डडेल्धुराका कार्यालय सचिव रामबहादुर बिष्टले बताए ।
उक्त वडामा ८४ जना पुराना क्रियासिल सदस्यहरुको सदस्यता नविकरण भइसकेकोले पार्टीको निति अनुसार थप ८४ जनालाई नयाँ क्रियासिल सदस्यता वितरण गरिएको गन्यापधुरा–१ का वडा सभापति पदमबहादुर महताले बताए ।
अब जिल्लाका सबै वडामा जिल्ला स्तरीय नेताहरुको सहभागितामा नयाँ क्रियासिल सदस्यता वितरण गरिने नेपाली कांग्रेसले जनाएको छ । नयाँ क्रियासिल सदस्यता वितरणका सन्दर्भमा जिल्लास्तरीय नेताहरुबीच कुनै विवाद देखिएको छैन र सदस्यता वितरण अभियान जिल्लाव्यापी रुपमा प्रभावकारी ढंग बाट सञ्चालन गरिने नेपाली कांग्रेस डडेल्धुराका सभापति मल्लले बताए ।
