काठमाडौँ – पछिल्लो समय नेताहरू उपचारको लागि भारत जाने क्रम बढेको छ। केहि समय अघि नेकपाका अध्यक्ष पुष्पकमल दाहाल ‘प्रचण्ड’ले आफ्नी श्रीमतीलाई उपचारका लागि भारत लागेका थिए। त्यसपछि नियमित स्वास्थ परिक्षण लागि भन्दै भारत गएका नेकपाका वरिष्ठ नेता तथा पूर्वप्रधानमन्त्री झलनाथ खनाल शनिवार मात्रै नेपाल फर्किएका छन्।
अब भारत जाने पालो जनता समाजवादी पार्टीका संघीय परिषद् अध्यक्ष तथा पूर्व प्रधानमन्त्री डा. बाबुराम भट्टराईको रहेको छ। उनको पेटमा समस्या देखिएपछि उपचारका लागि भारत जान लागेका हुन्। भट्टराई आइतबार नेपाल वायुसेवा निगमको जहाजबाट भारत दिल्ली जाँदै छन् ।
पेटमा समस्या देखिएपछि उनी उपचारका लागि काठमाडौँको निदान अस्पतालमा भर्ना भएका थिए । परीक्षणका क्रममा उनको ‘न्युरो इन्डोक्राइनको ट्युमर’ रहेको आशंका गरेपछि थप उपचारका लागि भट्टराई दिल्ली जान लागेका हुन् ।
दिल्लीमा उनको उपचार ‘इन्स्टिच्युट अफ लिभर एण्ड बिलिअरी साइन्सेस’ अस्पतालमा हुनेछ । उपचारका लागि दिल्लीमा रहँदा उनको बसाइ दिल्लीमा रहेको नेपाली दुतावासमा हुनेछ । भट्टराईसँगै पत्नी हिसिला र उनका प्रेस संगोजक विश्वदीप पाण्डेय पनि दिल्ली जाँदैछन् ।
