प्रधानमन्त्री केपी शर्मा ओलीले सरकार गिराउन गम्भीर षडयन्त्र भएको बताएका छन्। सरकार र नेत्रविक्रम चन्द (विप्लव) नेतृत्वको नेकपाबीच राष्ट्रिय सभागृहमा आयोजित हस्ताक्षर समारोहमा प्रधानमन्त्री ओलीले प्रचण्ड–नेपाल समूहप्रति लक्षित गर्दै सरकार ढाल्ने षडयन्त्रमा लागेको बताएका हुन्।
‘उता (प्रचण्ड–नेपाल) संसदीय दलको बैठक बसेको भन्ने सुनेको छु। खोई, कुन पार्टीको हो? म संसदीय दलको नेता यहाँ छु’ ओलीले भने, ‘तमासा देखाएका छन्। आफ्नो दुई तिहाईको सरकार ढालेर अरुलाई लौ प्रधानमन्त्री बनिदिनुपर्यो भन्दै किस्तीमा प्रधानमन्त्री पद राखेर बाँड्दै हिँडेका छन्।’
प्रधानमन्त्री ओलीले आफ्नो पार्टीले अरुलाई प्रधानमन्त्री दिन खोजेको भनेर भ्रम छर्न खोजिएको र त्यो सत्य नभएको बताए।
उनले सरकार ढालेपनि आफू फेरि निर्वाचनका माध्यमबाट सिंहदरबार छिर्ने बताए।
