नेकपा एकीकृत समाजवादीले १ जना उपमहासचिव थप्ने निर्णय गरेको छ । यसअघि तीन उपमहासचिव रहेकामा अब चार हुने छन्। आज बानेश्वरमा बसेको स्थायी कमिटी बैठकले जगन्नाथ खतिवडालाई उपमहासचिव बनाउने निर्णय गरेको हो ।
त्यस्तै, ३ जना सचिव पनि थप्ने निर्णय भएको बैठकपछि सञ्चारकर्मीसँग खतिवडाले जानकारी दिए । ‘पार्टीले अहिलेको परिस्थितिलाई हेर्दै १ उपमहासचिव थप्ने निर्णय गरेको छ । ३ जना सचिव थप्ने भएको छ । त्यसमध्ये एक गरिमा शाह, जीवनराम श्रेष्ठ, भागवत विश्वास हुनुहुन्छ,’ खतिवडाले भने ।
त्यस्तै, आफ्नाे पार्टीले ४ वटा मन्त्रालय पाउने पनि उनले जानकारी दिए । जसमा शहरी विकास, स्वास्थ्य, पर्यटन र श्रम मन्त्रालय रहेको छ । ‘हामीले ४ मन्त्रालयमा चित्त बुझायौं । अरु केही प्राविधिक कारणहरु पनि छन्,’ खतिवडाले भने ।
उनका अुनसार भोलि वा पर्सिभित्र मन्त्रिपरिषदले पूर्णता पाउनेछ । साथै, डा. विजय गुरुङको संयोजकत्वमा सम्पर्क समन्वय कमिटी गठन गरिएको पनि उनले जानकारी दिए ।
३०१ जना केन्द्रीय सदस्यको नामावली टुंगो लगाइसकेको भन्दै भोलि वा पर्सि नामावली सार्वजनिक गर्ने उनले बताए । ‘केन्द्रीय कमिटीको संख्या सार्वजनिक गर्न आज गृहकार्य गर्यौँ । केन्द्रीय सचिवालयले भोलि टुंगो गर्नेछ । भोलि वा पर्सिमा नामहरू सार्वजनिक गर्नेछौँ । ३०१ को नाम फाइनल भइसकेको छ,’ उनले भने ।
बैठकले ३०१ केन्द्रीय सदस्यको नाम टुंग्याएको र केन्द्रीय सचिवालयले त्यसमा भोलि थप गृहकार्य गरेर पर्सि नाम सार्वजनिक गरिनेछ। बैठकले केन्द्रीय आयोगमा ३५ सदसय हुने, स्थानीय कमिटीमा ६ पदाधिकारी रहने, जिल्ला कमिटीमा आधारभूत संख्या १०१ हुने र प्रत्येक प्रादेशिक निर्वाचन क्षेत्रबाट ५ जना जिल्ला कमिटीमा रहने पनि निर्णय गरेको छ।
पोलिटब्युरो चाँडै गठन गर्ने पनि बैठकले निर्णय गरेको छ। बिजय गुरुङको संयोजकत्वमा सम्पर्क समन्वय कमिटी गठन पनि भएको छ।
त्यस्तै बेदुराम भुसालको नेतृत्वमा प्रकाश ज्वाला, जगन्नाथ खतिवडा, गंगालाल तुलाधर र विजय गुरुङ रहेको केन्द्रीय कार्यालय स्थापना गरेको र भुसालकै नेतृत्वमा ११ जना सदस्य केन्द्रीय सचिवालय पनि गठन गरेको बताइएको छ।
