काठमाडौं । काठमाडौंको टोखास्थित धापासीमा रहेको एसिया प्यासेफिक स्कुलमा अबाकस प्रतियोगीता सम्पन्न भएको छ । बाल बिकास एनसीमास संस्थाको सहकार्यमा सम्पन्न भएको प्रतियोगीतामा कक्षा ३ देखि ७ सम्मका विद्यार्थीहरु सहभागी थिए ।
प्रतियोगीताबाट छानिएकामध्ये ३ जना राष्ट्रियस्तरको अबाकस प्रतियोगीतामा प्रतिष्पर्धा गर्न पाउनेछन् । अबाकससँगै एसिया प्यासेफिकमा आईतबार नै हस्तलेखन प्रदर्शनीसमेत भएको छ । प्रदर्शनीका क्रममा ६ महिनाअघिको विद्यार्थीको लेखाई र अहिलेको लेखाईको मूल्यांकन गरिएको थियो ।
स्कुल लेबल अबाकस प्रतियोगीता सकिएलगत्तै बाल बिकास एनसीमासका कार्यकारी निर्देशक तेजु नेपालले विद्यार्थीले देखाएको क्षमताले आफू निक्कै गौरवान्वित भएको बताए । त्यसक्रममा उनले बालबालिकासँग विभिन्न चरणमा अबाकस डेमोस्ट्रेसनसमेत गरेका थिए ।
कार्यक्रममा सहभागी हुन पुगेका अभिभावकले अबाकसले आफ्ना बालबालिकामा निक्कै नै राम्रो परिवर्तन आएको प्रतिक्रिया दिएका छन् । बालबालिकाको ध्यान केन्द्रीत गर्न यसले निक्कै ठूलो भूमिका खेलेको उनीहरुको भनाई छ ।
विद्यालयका प्रिन्सिपल रमेश घिमिरेले छोटो समयमै अभिभावकको माया पाएको प्रतिक्रिया दिए । बालबालिकालाई ३० प्रतिशत अतिरिक्त क्रियाकलापमा संलग्न गराउँदै आएको भन्दै उनले अबाकस निक्कै राम्रो प्रणाली रहेको आफूले महसुस गरेको बताए । बालबालिकाको मस्तिस्क विकासमा यसले निक्कै ठूलो टेवा पुर्याएको भन्दै उनले खुशी व्यक्त गरे ।
फागुनमा राष्ट्रियस्तरको अबाकस प्रतियोगीता हुँदैछ । त्यसका लागि विभिन्न विद्यालयमा ‘स्कुल लेबल अबाकस प्रतियोगीता’ भईरहेका छन् । शैक्षिक क्षेत्रमा नयाँ प्रयोग गरिएको अवाकसले बालबालिकाको मष्तिस्क विकास, गणितीय समस्या समाधान गर्न सहज, ध्यानलाई केन्द्रीकृत गराउने गर्दछ ।
विश्वका १ सय ५० भन्दा बढी देशमा यसको प्रयोग भइरहेको छ । बालबालिकाको शैक्षिक प्रणालीमा सुधार ल्याउन २ हजार बर्ष पुरानो फादर अफ कम्प्युटर अवाकसलाई विद्यालयले बैकल्पिक विषयका रुपमा पठनपाठन गराउँदै आएको छ ।
