काठमाडौं । काठमाडौंको तारकेश्वर ९ मा रहेको शुभकामना इङ्लिस बोर्डिङ स्कुलमा विद्यालय स्तरीय अबाकस प्रतियोगीता सम्पन्न भएको छ । ५ देखि १३ वर्ष उमेर समूहका बालबालिकाहरु सहभागी विद्यालय स्तरीय प्रतियोगीताबाट छानिएकामध्ये ३ जनाले राष्ट्रिय स्तरको प्रतिष्पर्धामा सहभागी बन्न पाउनेछन् । आगामी फागुन २० गते राष्ट्रियस्तरको प्रतिगोगिता हुँदैछ । यसै वर्षदेखि शुभकामना स्कुलले अबाकस लागु गरेको हो ।
कार्यक्रममा विद्यालयका प्रिन्सिपल कुमार ढकालले आफ्नो विद्यालयमा अबाकस लागु गर्न पाउँदा बाल विकास एनसीमास संस्थालाई धन्यवाद व्यक्त गरे । अबाकससँगै अरु धेरै अतिरिक्त क्रियाकलापहरु आफ्नो विद्यालयमा हुने गरेको जानकारी गराउँदै अबाकसले बालबालिकाको मस्तिस्कमा निक्कै ठूलो सहयोग गरिरहेको बताए ।
पहिले गणितमा समस्या भएका बालबालिकाहरुका लागि पनि यसले निक्कै सहयोग गरेको र उनीहरुलाई निक्कै सजिलो भएको उनले बताए । अबाकस बालबालिकालाई मात्रै नभई शिक्षक र अभिभावकका लागि पनि उपयोगी रहेको भन्दै उनले आफ्नो विद्यालयले राष्ट्रिय र अन्तर्राष्ट्रिय स्तरको प्रतियोगीतामा पनि विजयी हाँसिल गर्ने बताए ।
विद्यालयका निर्देशक कृष्ण प्रसाद अधिकारीले २०६० सालमा विद्यालय स्थापना भएको स्मरण गराउँदै धेरे आरोह र अवरोह पार गर्दै विद्यालय यहाँसम्म आईपुगेको बताए । विद्यालयले अबाकसलगायत अरु थुप्रै अतिरिक्त क्रियाकलापमा जोड दिँदै आएको भन्दै उनले स्कुलले एकपछि अर्को काँचुली फेर्दै गएको बताए । बालबालिकाको स्मरणशक्ति वृद्धि विकासका लागि अबाकस निक्कै राम्रो साबित भएको उनले दाबी गरे ।
विद्यालयका प्राईमरी लेवल ईन्चार्ज मैयाँ श्रेष्ठले सुरुमा अबाकस ल्याउँदा आफूलाई पनि केही कन्फ्यूज भएको तर यो लागु भएपछि यसको आवश्यकता महसुस गरेको बताए । यसले गणित विषयको शिक्षण सिकाई क्रियाकलाप गर्न पनि सजिलो भएको भन्दै उनले अबाकस अध्यापन गराउने शिक्षकहरुलाई धन्यवाद व्यक्त गरे ।
बाल बिकास एनसीमास संस्थाका तेजु नेपालले अत्यन्तै धेरै अभिभावको उपस्थितिमा विद्यालय स्तरीय अबाकस प्रतियोगीता सम्पन्न गर्न सफल भएकोमा धन्यवाद व्यक्त गरे । विद्यार्थीको उत्साहजनक प्रस्तुती देखिएको भन्दै उनले सरकारसँग समन्वय गरेर विभिन्न जिल्लामा अबाकस लगु गराउने र देशव्यापी बनाउने आफूहरुको लक्ष रहेको बताए ।
प्रतियोगीतामा सहभागी बालबालिकाहरुले आफ्नो विद्यालयमा अबाकस लागु भएपछि पढाईमा निक्कै सहयोग मिलेको बताएका छन् । आफूहरुमा ध्यान केन्द्रीय गरेर गणितिय समस्या समाधान गर्न अबाकसले निक्कै ठूलो टेवा पुर्याएको उनीहरुको भनाइ छ ।
शैक्षिक क्षेत्रमा नयाँ प्रयोग गरिएको अवाकसले बालबालिकाको मष्तिस्क विकास, गणितीय समस्या समाधान गर्न सहज, ध्यानलाई केन्द्रीकृत गराउने गर्दछ । विश्वका १ सय ५० भन्दा बढी देशमा यसको प्रयोग भइरहेको छ ।
बालबालिकाको शैक्षिक प्रणालीमा सुधार ल्याउन २ हजार बर्ष पुरानो फादर अफ कम्प्युटर अवाकसलाई विद्यालयले बैकल्पिक विषयका रुपमा पठनपाठन गराउँदै आएको छ ।
