कुनमिङ — चीनको युन्नान प्रान्तको राजधानी कुनमिङ पुग्नेबित्तिकै सहरको व्यस्तता र व्यवस्थित संरचनाले ध्यान खिच्छ। फराकिला सडक, सफा वातावरण र अनुशासित यातायातले पहिलो नजरमै सकारात्मक प्रभाव पार्छ।
सहरको मध्यभागतिर जाँदा आधुनिक गगनचुम्बी भवनहरू र व्यावसायिक केन्द्रहरूको बाक्लो उपस्थिति देखिन्छ। बैंक, सपिङ कम्प्लेक्स र होटलहरूले यो सहर चीनको तीव्र विकासको उदाहरणजस्तै देखिन्छ।
त्यही व्यस्त सहरको बीचमा पुग्दा ‘जिन्मा–बिजी’ (Jinma Biji) आर्चवे देखिन्छ। परम्परागत चिनियाँ शैलीमा बनाइएको यो गेटले एकाएक पुरानो इतिहासको झल्को दिन्छ। ‘जिन्मा’ अर्थात् गोल्डेन हर्स गेटमा कुँदिएको सुनौलो घोडाको आकृति निकै आकर्षक देखिन्छ।
जिन्मासँगै रहेको ‘बिजी’ अर्थात् जेड रुस्टर गेट पनि उत्तिकै आकर्षक छ। यी दुई गेटहरू करिब चार सय वर्षअघि मिङ राजवंश को समयमा निर्माण गरिएको भन्ने इतिहास पाइन्छ। स्थानीयहरूका अनुसार यी प्रतीकहरूले शुभता र समृद्धिको संकेत गर्छन्।
गेट वरिपरि पुग्दा पर्यटकहरूको भीड, फोटो खिच्ने मानिसहरू र स्थानीय व्यवसायको चहलपहलले क्षेत्रलाई झन् जीवन्त बनाएको देखिन्छ। सडक किनारमा स्थानीय परिकार र साना पसलहरूले पर्यटकलाई आकर्षित गरिरहेका हुन्छन्।
साँझ पर्दै जाँदा बत्तीहरूले झिलिमिली हुँदा यो क्षेत्र झन् सुन्दर देखिन्छ। आधुनिक भवनको उज्यालो र परम्परागत गेटको कलात्मक बनावटबीचको संयोजनले छुट्टै अनुभूति दिन्छ।
यसरी हेर्दा, कुनमिङ को ‘जिन्मा–बिजी’ क्षेत्र केवल ऐतिहासिक सम्पदा मात्र नभई परम्परा र आधुनिकताको संगम अनुभव गर्ने उत्कृष्ट स्थलका रूपमा विकसित भएको स्पष्ट देखिन्छ।
