काठमाडौं – घरेलु मैदानमा सुरु भएको काभा महिला भलिबल च्याम्पियनसिप २०२६ मा नेपालले हारबाट यात्रा थालेको छ। त्रिपुरेश्वरस्थितराष्ट्रिय खेलकुद परिषद्को कभर्ड हलमामा शुक्रबार भएको उद्घाटन खेलमा नेपाल भारतसँग ३–२ को सेटमा पराजित भयो।
उत्साहजनक प्रदर्शन गरेको नेपालले पहिलो सेट २५–२१ ले जित्दै शानदार सुरुवात गरेको थियो। घरेलु समर्थकको साथ पाएको नेपाली टोलीले सुरुआती सेटमा भारतलाई दबाबमा राख्दै १–० को अग्रता बनायो।
तर त्यसपछि भारतले पुनरागमन गर्यो। दोस्रो सेट २५–२० र तेस्रो सेट २५–१९ ले आफ्नो पक्षमा पार्दै भारतले खेलमा २–१ को अग्रता बनायो।हारको दबाबमा रहेको नेपालले चौथो सेटमा उत्कृष्ट पुनरागमन गर्यो। निकै प्रतिस्पर्धात्मक बनेको सेट नेपालले २५–२१ ले जितेपछि खेल २–२ को बराबरीमा पुगेको थियो।
निर्णायक पाँचौं सेटमा भने भारत हाबी बन्यो। भारतले १५–९ ले सेट जित्दै खेल आफ्नो पक्षमा पार्यो र प्रतियोगितामा विजयी सुरुवात गर्न सफल भयो।
यस खेलमा निरूता ठगुन्नाले पहिलो पटक नेपाली टोलीको कप्तानी सम्हालेकी थिइन्। नेपालले अब शनिबार किर्गिस्तानसँग दोस्रो खेल खेल्नेछ।यसअघि शुक्रबार नै भएको पहिलो खेलमा इरानले बङ्गलादेशलाई सोझो सेटमा हराएको थियो। एकपक्षीय बनेको खेलमा इरानले २५–६, २५–९ र २५–१० को सहज जित निकाल्यो।
एफआईभीबी वरियतासँग जोडिएको प्रतियोगिता भएकाले सहभागी सबै टोलीका लागि यो प्रतियोगिता महत्वपूर्ण मानिएको छ। आठ राष्ट्र सहभागी प्रतियोगितामा नेपाल, भारत, किर्गिस्तान र माल्दिभ्स समूह ‘ए’ मा छन् भने श्रीलंका, बङ्गलादेश, इरान र काजकिस्तान समूह ‘बी’ मा रहेका छन्। शुक्रबार नै किर्गिस्तान र माल्दिभ्सबीच तेस्रो खेल हुनेछ।
