नेकपा माओवादी केन्द्रका अध्यक्ष पुष्पकमल दाहाल प्रचण्डले नागरिकता विधेयकलाई लिएर राष्ट्रपति विद्यादेवी भण्डारीले पोलिटिकल इस्यू बनाउन खोजेको दाबी गरेका छन्।
शुक्रबार (२४ भदौ) पोखरा विमानस्थलमा संचारकर्मी सँग कुराकानी गर्दै अध्यक्ष प्रचण्डले सो दाबी गरेका छन्।
‘राष्ट्रपतिज्यूलाई दोस्रोपटक संविधानले कुनै ठाउँ नै दिएको छैन्, त्यसकारण उहाँले प्रमाणीकरण गर्नुहुन्छ जस्तो नै लाग्छ मलाई,’ प्रचण्डले भने, ‘हुन त मैले केहीदिन अघि मैले राष्ट्रपति जीसँग भेटेर कुरा गर्दा उहाँ चाँही यो विषयलाई पोलिटिकल विषय बनाउने मुडमा भएकै देखेको थिएँ मैले। ’
राष्ट्रपतिले नागरिकता विधेयक प्रमाणीकरण नगर्ने संभावना पनि भएको उनले बताए। ‘त्यसकारण नगर्ने संभावना पनि छ। त्यसो भयो भने अदालतमा जान्छ। अदालतको फैसलापछि जान्छ। दोस्रो उहाँले राजीनामा दिनुपर्छ।’ प्रचण्डले भने।
उनले राष्ट्रपतिसँगको भेटमा पनि सो कुरा भनेको बताए। ‘दोस्रोपटक पनि प्रमाणीकरण भएन भने या त राजीनामा दिनुपर्छ या त अदालतमा जान्छ भनेको थिएँ। यो अनुमानको कुरा हो मलाई लाग्छ राष्ट्रपतिज्यूलाई प्रमाणीकरण गर्नुहुन्छ।’ प्रचण्डको भनाई छ।
