काठमाडौँ – काभ्रेपलाञ्चोकको पाँचखालबाट ३८ तोला सुन चोरी गरेर भागेका ५ जना काठमाडौँको ठमेलबाट पक्राउ परेका छन्।
शनिबार पाँचखालको एक घरबाट ३८ तोला सुन चोरेर भागेका ५ जनालाई आइतबार प्रहरीले काठमाडौँको ठमेलबाट पक्राउ गरेको हो।
पक्राउ पर्नेमा ओखलढुंगाका देवराज दाहाल, सिन्धुपाल्चोकका रामचन्द्र चालिसे, काभ्रेका राम तामाङ, हुँइबहादुर तामाङ र राजन तामाङ रहेको महानगरीय प्रहरी परिसरका प्रवक्ता डीएसपी प्रमेश विष्टले जानकारी दिए।
डीएसपी विष्टले देवराज र रामचन्द्रका साथमा सुन फेला परेको जानकारी दिए।
प्रहरीले उक्त घटनाको मुख्य योजनाकार राजन तामाङ रहेको बताएको छ ।
माइली तामाङको घरबाट गहना र पैसा हराएपछि प्रहरीले खोजी गर्दा उक्त टोलीलाई काठमाडौंको ड्रागन डिस्कोमा फेला पारेको थियो । उनीहरुमाथि थप अनुसन्धानका लागि जिल्ला प्रहरी कार्यालय काभ्रे पठाइएको महानगरीय प्रहरी परसर काठमाडौंले जानकारी दिएको छ ।
