काठमाडौं – सप्तरीको बोदेबरसाइन नगरपालिका ३ कुशमारस्थित सार्वजनिक पोखरीमा माछा मार्ने विषयमा दुई पक्षबीच झगडा तथा कुटपिट हुँदा एकजनाको मृत्यु भएको छ । कुटपिटमा परि सोही ठाउँ बस्ने ४५ वर्षीया गंगिया देवी मण्डलको घटनास्थलमै मृत्यु भएको हो । उक्त घटनामा संलग्न चारजनालाई प्रहरीले पक्राउ गरेको छ ।
पक्राउ पर्नेहरुमा सोही ठाउँ बस्ने ५० वर्षीय शिवशरण मण्डल, ४७ वर्षीय बिजय मण्डल, २२ वर्षीय सुरेन्द्र मण्डल र २८ वर्षीय रबित मण्डल रहेका छन् ।
ईलाका प्रहरी कार्यालय बोधेबसाईन र ईलाका प्रहरी कार्यालय कडरबोनाबाट खटिएको प्रहरीले कुटपिटमा संलग्न उनीहरुलाई पक्राउ गरेको हो । कुटपिटबाट घाइते भएका ४ जनाको नर्सिङहोम लहान सिरहामा उपचार भइरहेको छ । कुटपिटमा संलग्न हाल फरार ३ जनाको खोजी गर्नुका साथै थप अनुसन्धान भइरहेको प्रहरीले जनाएको छ ।
