काठमाडौं – निर्धारित मितिमै प्रतिनिधिसभाको निर्वाचन हुने प्रधानमन्त्री केपी शर्मा ओलीले बताएका छन् ।
काठमाडौँमा राष्ट्रिय युवा संघले आयोजना गरेको कार्यकर्ता भेलालाई सम्बोधन गर्दै प्रधानमन्त्री ओलीले आगामी वर्ष बैशाख १७ गते र २७ गते नै निर्वाचन हुने बताएका हुन् ।
एकदिन पनि निर्वाचन तलमाथि नहुने भन्दै उनले कार्यकर्ताहरुलाई निर्वाचनको वातावरण सिर्जना गर्न आग्रह गरे ।
प्रधानमन्त्री ओलीले आफूलाई लोकतन्त्र मास्न लागेको आरोप लगाइएको भन्दै लोकतन्त्र जोगाउन जेलनेल भोगेर आएकाले निर्धारित मितिमै निर्वाचन गराउने प्रतिवद्धता व्यक्त गरे । प्रधानमन्त्रीले प्रतिनिधिसभा विघटन संवैधानिक भएको जिकिर गरे । सर्वोच्च अदालतलाई सडकबाट प्रभावित गराउन खोजिएको भन्दै उनले स्वतन्त्र न्यायपालिकाको कदर गर्नुपर्ने बताए ।
प्रधानमन्त्री ओलीले देश र संविधानमाथि संकट नपरि स्वार्थी तत्वहरुको स्वार्थमा संकट परेको टिप्पणी गरे । उनले सरकारलाई काम गर्न नदिने, संविधानको कार्यान्वयन हुन नदिने, संवैधानिक आयोगहरुलाई पूर्णता दिन नचाहाने लगायतका विभिन्न अवरोधहरु सिर्जना गरिएका कारण देशमा बाँकी रहेको अवधिलाई खेर नफाल्न निर्वाचनमा जानु पर्छ भनि निर्वाचन घोषणा गरेको बताए ।