काठमाडौं – खिचडीलाई जाउलो भन्ने भ्रमका कारण धेरैले यसको नाम सुन्नासाथ बिरामीको खाना भनेर नाक खुम्च्याउने गर्छन । तर खिचडी निकै स्वादिलो र पोषणयुक्त खानेकुरा हो । शुद्ध शाकाहारीहरुको लागि योभन्दा राम्रो खाना तपाईंका लागि केही हुनसक्दैन ।
एकातर्फ खिचडी बनाउन निकै सजिलो छ भने अर्काेतर्फ यसमा शरिरलाई आवश्यक पौष्टिक तत्व पाइन्छन । चामल र केही दाललाई मिसाएर बनाइने खिचडी एक सुपाच्य भोजन हो । हुन त खिचडीमा मसलाको प्रयोग शून्य बराबर हुन्छ तर चाहेको खण्डमा स्वादका लागि थोरै मसलाको प्रयोग गर्न सकिन्छ । खिचडीमा दही मिसाएर खाँदा यसको स्वाद दोब्बर हुन जान्छ ।
खिचडी बनाउने तरिका
चामल र मुग दालको खिचडी स्वादिलो हुन्छ । यसमा सब्जी पनि मिसाउन सकिन्छ । चामल र हरियो मटर, मुगको दाललाई आधा घण्टा जति पानीमा भिजाउन राख्नुहोस् । प्रेशर कुकरमा घिउ तताउनुस र त्यसमा थोरै जिरा हालेर कम आँचमा त्यसलाई केहिछिन राख्नुहोस । त्यसमाथि हिंग छर्कनुहोस् ।
त्यसमा ल्वाङ, मरिच र दालचिनीको धुला र बेसार हाल्नुहोस् । अब लसुन अदुवाको पेस्ट हालेर केहि समय भुट्नुहोस् । पानीमा भिजाइएको चामल र हरियो मटरलाई प्रेशर कुकरमा हाल्नुहोस् र त्यसमाथि मुगको दाल हालेर राम्ररी चलाउनुहोस् । पानी हालेर केहि छिन राखेर नुन हाल्नुहोस् । अब प्रेशर कुकरको ढक्कन लगाउने । चार पटक जति सिटी लगाएपछि खिचडी पाक्छ । खिचडीलाई दही र अचारसँग सर्भ गर्नुहोस र परिवारसँग रमाउँदै मिठो स्वाद लिनुहोस् ।
स्वादिलो खिचडी खानाले हुने फाइदा यस प्रकार रहेका छन् :
पोषिलो हुनाले
खिचडी कार्बोहाइड्रेट, भिटामिन, क्याल्सियम, फाइबर, म्याग्निशियम, पोटाशियम र फस्फोरस जस्ता तत्वले भरपुर हुन्छ । यसमा विभिन्न प्रकराको सागसब्जी मिसाएर यसको पोषक तत्वलाई थप वृद्धि गर्न सकिन्छ ।
पाचनयोग्य
खिचडीमा धेरै मात्रामा मसला र तेल वा घ्यूको प्रयोग हुँदैन जसकारण यो सहजै पचाउन सकिन्छ । पाचन तन्त्र कमजोर भएकाले खिचडीको सेवन गर्नु फाइदाजनक हुन्छ । पाचन प्रणालीमा भार नदिने हुनाले यसले पाचन प्रणाली मजबुद बनाउन पनि सहयोग गर्छ ।
रोग प्रतिरोधात्मक क्षमता बढाउन
खिचडीको नियमित सेवन गर्नाले पित्त र कफको समस्या टाढा भएर जान्छ । यसलेले शरिरलाई ऊर्जा दिने काम साथै रोग प्रतिरक्षा क्षमतालाई बढाउन पनि मद्दत गर्दछ ।
